QR Prezıdentiniń teleradıokesheni Belgııa týraly derekti fılm túsirýde
BRıÝSSELЬ. Sáýirdiń 7-si. QazAqparat /Dımash Syzdyqov/ - Elbasy Nursultan Nazarbaevtyń Belgııa Koroldigine saparynyń qarsańynda Qazaqstan Prezıdentiniń teleradıokesheni sol el týraly derekti fılm túsirý úshin Brıýsselge keldi.
Keshenniń fılm túsirý basqarmasynyń bastyǵy Gúlzada Qamarovanyń aıtýynsha, bıyl Elbasynyń sheteldik saparlarynyń qorytyndysy boıynsha «Álemge kózqaras» degen ataýmen derekti fılmder toptamasyn jasaý josparlanyp otyr. «Jaqyn arada biz Elbasynyń AQSh-qa, Ulybrıtanııaǵa, Belgııa men Ońtústik Koreıaǵa saparlary boıynsha fılmder túsirýdi josparlap otyrmyz jáne ol fılmder teleradıokeshenniń «altyn qoryna» kiretin bolady», - deıdi G.Qamarova.
Fılmderde Elbasy saparmen barǵan elderdiń tarıhy, mádenıeti, salt-dástúri týraly, sondaı-aq qarapaıym azamattar men olardyń bizdiń respýblıkamyzǵa degen kózqarastary týraly áńgimelenedi. «Bizdiń basty mindetimiz - kórermenderge Qazaqstannyń seriktesteri týraly baıandaý», deıdi G.Qamarova.
Respýblıkalyq telearnalardaǵy atalmysh derekti fılmderdiń kórsetilimderi 2010 jyldyń ekinshi jartysyna josparlanyp otyr.
