QR Prezıdentiniń shákirtaqysyn ıelenetin 10 magıstrant irikteldi
ASTANA. 31 shilde. QazAqparat - Búgin Qazaqstan Respýblıkasynyń Bilim jáne ǵylym mınıstri Baqytjan Jumaǵulovtyń tóraǵalyǵymen Qazaqstan Respýblıkasynyń Prezıdentiniń shákirtaqysy - «Nazarbaev shákirtaqysyn» taǵaıyndaýǵa magıstranttardy irikteý boıynsha QR BǴM konkýrstyq komıssııasynyń otyrysy ótti, dep habarlady vedomstvonyń baspasóz qyzmetinen.
Qazaqstan Respýblıkasy Ulttyq ǵylym akademııasynyń múshesi N.Á. Nazarbaevtyń aı saıynǵy shákirtaqy qory taǵaıyndaıtyn «Nazarbaev shákirtaqysy» elimizdegi mańdaıaldy joǵary oqý oryndarynyń 10 magıstrantyna tabystalady.
Shákirtaqy «júzden júırik, myńnan tulpar» atanǵan oqý úlgerimi úzdik, ǵylymı zertteý jumysymen aınalysyp, joǵary oqý ornynyń, qalanyń, elimizdiń qoǵamdyq qyzmetine belsendi aralasatyn magıstranttaryna taǵaıyndalady.
QR BǴM buıryǵyna sáıkes, joǵary oqý oryndary ekinshi jyl oqyp júrgen magıstranttardyń úmitkerler tizimin usyndy. Joǵary oqý oryndary ǵylymı keńesi sheshiminiń negizinde konkýrstyq komıssııanyń jumys toby ulttyq joǵary oqý oryndarynyń 50 magıstrantynyń tizimin qarap shyqty.
Komıssııanyń konkýrstyq talaptary boıynsha «Nazarbaev shákirtaqysynyń» joǵary talaptaryna sáıkes keletin 10 magıstrantty tańdap aldy. Barlyq úmitkerlerdiń oqý úlgerimi joǵary - 4,0 (GPA).
Nazarbaev shákirtaqysy osymen úshinshi jyl taǵaıyndalýda. Jyl saıyn úmitkerler sany artýda. Birinshi jyly konýkýrsqa 14 magıstrant qatysty, ekinshi jyly 28 magıstrant óz baqtaryn synaǵan. 2013-2014 jyly elimizdiń jetekshi joǵary oqý oryndarynyń 50 magıstranty usynyldy.
