QR Prezıdentiniń saılaýyna EKPA óz baıqaýshylaryn jiberedi
ASTANA. 11 naýryz. QazAqparat - Búgin Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev Eýropalyq Keńes Parlamenttik Assambleıasynyń Prezıdenti Mavlıýt Chavýshoglýmen telefon arqyly sóılesti,
dep habarlady QR SІM Baspasóz qyzmeti.
Áńgimelesýshi taraptar Qazaqstan men Eýropalyq Keńestiń Parlamenttik Assambleıasy arasyndaǵy yntymaqtastyq máselelerin jáne onyń nyǵaıýy men keńeıýin talqyǵa saldy. Qazaqstan men Eýropalyq Keńestiń Parlamenttik Assambleıasy arasyndaǵy yntymaqtastyq 2004 jyly Strasbýrg qalasynda qol qoıylǵan QR Parlementi men EKPA arasyndaǵy Yntymaqtastyq jónindegi kelisimge negizdeledi. Sol kezden bastap QR Parlamenti delegatsııasy Eýropalyq Keńes Parlamenttik Assambleıasynyń sessııalary men komıtetteriniń otyrystaryna, al EKPA Qazaqstannyń tıisti sharalaryna qatysýda.
"3 sáýir kúni ótetin Qazaqstan Prezıdentiniń kezekten tys saılaýy eldiń demokratııaǵa qaraı jasaǵan mańyzdy qadamy dep tanımyz", - dedi óz sózinde M.Chavýshoglý. Osyǵan baılanysty Eýropalyq Keńestiń Parlamenttik Assambleıasy saılaýdy baıqaýǵa óz tarapynan arnaıy delegatsııa joldaýǵa sheshim qabyldap otyr.
Óz kezeginde Q. Saýdabaev áńgimelesýshi tarapqa qabyldaǵan sheshimi úshin alǵysyn jetkize otyryp, aldaǵy saılaýǵa halyqaralyq qaýymdastyq óte úlken kóńil bólip otyrǵanyn atap ótti. EQYU-nyń Demokratııalyq ınstıtýttar jáne adam quqyqtary jónindegi bıýrosy, TMD Atqarýshy komıteti, UQShU, Parlamenttik Assambleıasy, IKU, ShYU jáne basqa da halyqaralyq uıymdar óz baıqaýshylaryn joldap otyrǵany osynyń aıqyn dáleli bolyp tabylady. Sonymen qatar,Syrtqy saıası vedomstvo basshysy Qazaqstanda olardyń jumys jasaýyna jáne saılaýdy halyqaralyq talaptarǵa saı ótkizýge tolyq jaǵdaı jasalǵanyn erekshe atap aıtty.
