QR Prezıdentiniń Kýbogy men Álem kýbogy úshin at sportynan jarys elorda kúni qarsańynda ótedi
ASTANA. 11 maýsym. QazAqparat - Astana kúnin merekeleý qarsańynda, 3-5 shildede elordalyq «Qazanat» ıppodromynda QR Prezıdentiniń Kýbogy men Álem kýbogy úshin at sportynan halyqaralyq jarys ótedi.
«Aldaǵy chempıonatqa Armenııa, Grýzııa, Qazaqstan, Qyrǵyzstan, Reseı, Ózbekstan jáne Ýkraınadan elýden astam shabandoz ben sáıgúlik qatysady», - dep habarlaıdy QR At sporty federatsııasyna silteme jasaǵan Astananyń 15 jyldyǵyn ázirleý men ótkizý jónindegi uıymdastyrý komıtetiniń medıa toby.
Úsh kún boıy QR Prezıdentiniń Kýbogy, Ult Kýbogy, ENRC kýbogy, Maserati Kýbogy, Samsung Kýbogy úshin komandalyq jáne jeke jarystarda chempıondyq ataqqa baq synasatyn bolady.
Reseılik «úshjuldyzdy» deńgeıdegi kýrs-dızaıner Vladımır Platov qatysýshylardyń 120-dan 160 sm-ǵa deıingi bıiktikti qateliksiz júrip ótýine baǵdar jasamaq. Olardyń sheberlikterin halyqaralyq at sportynyń bedeldi tóreshileri: Marek Zaleskı (Polsha), Anna Skabard (Ýkraına), Keo Chang ıAng (Koreıa), Sarpartap Sınh (Indııa) baǵalaıtyn bolady.
Astana ıppodromynyń jarys alańynda Ortalyq Azııanyń kórnekti shabandozdarynyń arasynda qyzyqty tartys básekesi qyzbaq. Ony klassıkalyq at sportynyń 3000-ǵa tarta jankúıerleri tamashalamaq. Ippodromǵa kirý tegin.
