QR Prezıdentiniń QHR Tóraǵasy Sı Tszınpındi «Altyn Qyran» ordenimen marapattaý rásiminde sóılegen sózi
Qazaqstan Prezıdenti Qasym-Jomart Toqaevtyń sóılegen sózi:
Qurmetti Sı Tszınpın myrza!
Qymbatty dosym!
Hanymdar men myrzalar!
Búgin uly Qytaı eliniń basshysy Sı Tszınpın myrza Qazaqstanǵa memlekettik saparmen kelip otyr. Bul – biz úshin zor mártebe. Siz – halqyńyzdyń jappaı qoldaýyna ıe bolǵan naǵyz kóshbasshysyz. Búkil Qytaıǵa jańashyldyq, rýh berip, dana saıasatyńyzben memleketti alǵa bastap kelesiz. El basqarý isinde mol tájirıbeńiz jáne erekshe tulǵalyq qasıetterińiz bar. Osynyń bári ózińizdi jurtyńyzdyń yqylasyna bóledi. Sizdiń basshylyǵyńyzben halqyńyz jańa dáýirge qadam basty. Qytaı ultynyń uly jańǵyrý kezeńi bastaldy. Byltyr Qytaı eli birinshi júzjyldyq mereıtoıynyń maqsatyn oryndady. Oǵan barsha álem jurtshylyǵy kýá boldy. Sizder kedeılikti birjolata joıyp, ortasha turmysy bar qoǵam qurdyńyzdar. Tutas dáýirdi ózgertken osy jeńis ekinshi júzjyldyq mereıtoıdyń basty mindetterin tabysty oryndaýǵa jol ashary anyq. Qytaı Halyq Respýblıkasy ǵasyrlyq belesine deıin damyǵan, aldyńǵy qatarly memleketke aınalady dep senemin. Sizdiń taǵdyry ortaq adamzat qoǵamdastyǵyn qurý týraly ozyq ıdeıańyz jáne «Bir beldeý - bir jol» atty tarıhı bastamańyz jer júziniń nazaryn aýdardy. Osy tujyrym jańa úlgidegi halyqaralyq qatynastar júıesin qurýǵa negiz boldy. Bul úlgi ózara tıimdi yntymaqtastyq ornatýdy kózdeıdi. Sizdiń jahandyq qaýipsizdik pen damýdy qamtamasyz etý jónindegi strategııalyq bastamalaryńyzdyń mańyzy óte zor. Qazir barsha adamzattyń aldynda kúrdeli syn-qaterler tur. Sizdiń oılaryńyz osyǵan batyl toıtarys retinde baǵalanyp, álemde keńinen talqylanýda.
Sizdiń qazaq-qytaı qarym-qatynasyn turaqty damytýǵa qosqan úlesińiz ushan-teńiz. Biz 2019 jyly ózińizben birge eki eldiń yntymaqtastyǵyn jańa deńgeıge kóterýge kiristik. Máńgilik ári jan-jaqty strategııalyq seriktestik ornatýǵa ýaǵdalastyq. Qazaqstan Qytaı elimen túrli saladaǵy yntymaqtastyqty nyǵaıtýǵa múddeli. Biz bolashaqqa birge qadam basamyz. Osy jolda myzǵymas dostyqtan aınymaımyz.
Siz Qazaqstan men Qytaı halyqtary arasyndaǵy dostyq pen yntymaqtastyqty nyǵaıtýǵa orasan zor eńbek sińirdińiz. Biz muny joǵary baǵalaımyz. Men osy saladaǵy aıryqsha tarıhı rólińizdi eskere otyryp, Sizdi «Altyn Qyran» ordenimen marapattaý týraly sheshim qabyldadym. Bul marapat – Qazaqstan Respýblıkasynyń eń joǵary nagradasy. Bul sheshim ekijaqty qarym-qatynastar shejiresine altyn árippen jazylary sózsiz.
Qytaı Halyq Respýblıkasynyń Tóraǵasy Cı Tszınpınniń sóılegen sózi:
Qurmetti Prezıdent Toqaev myrza!
Qurmetti dostar!
Búgin meni «Altyn Qyran» ordenimen nagradtadyńyz. Bul maǵan ǵana kórsetilgen erekshe qurmet emes, sondaı-aq Sizdiń elińizdiń qazaq-qytaı qatynastaryn damytýǵa zor mán beretinin jáne qazaq halqynyń qytaı halqyna degen dostyq sezimin kórsetedi.
Prezıdent Toqaev myrza, Sizge jáne dostas qazaq halqyna shyn júrekten rızashylyǵymdy bildiremin. Eki el arasyndaǵy dıplomatııalyq qatynastarǵa 30 jyl toldy. Sodan beri qazaq-qytaı yntymaqtastyǵynyń joǵary damý deńgeıi berik saqtalyp keledi.
Bizdiń elderimiz arasyndaǵy saıası ózara seriktestik nyǵaıyp keledi. Ártúrli saladaǵy yntymaqtastyq qarqyndy damýda. Halyqaralyq qatynastarda tyǵyz baılanys ornady. Munyń bári elderimizdiń damýy men órkendeýine berik tirek boldy. Aımaqtaǵy beıbitshilik pen turaqtylyqty qoldaýǵa tyń serpin berdi.
Osy sapar barysynda Prezıdent Toqaev ekeýimiz Qytaı men Qazaqstan qarym-qatynasynyń mártebesin kóterýge kelistik. Bolashaqqa kóz júgirte otyryp, biz máńgilik dostyqqa, ózara tıimdilikke jáne órkendeýge baǵyttalǵan baılanystarymyzdyń jarqyn bolashaǵyna senimmen qaraımyz.
Men halyqtarymyzdyń dostyǵyn tanytatyn bul ordendi óte joǵary baǵalaımyn. Birlesken kúsh-jigerimizdiń arqasynda Qazaqstan men Qytaı arasyndaǵy yntymaqtastyqtyń nyǵaıyp, elderimiz ben halyqtarymyzdyń ıgiligi úshin qyran qustaı alysqa samǵaıtynyna senimdimin!
Foto: akorda.kz
