QR Prezıdentiniń kezekten tys saılaýynyń ashyqtyǵy tolyq qamtamasyz etilip otyr - OSK hatshysy
ASTANA. 3 sáýir. QazAqparat /Aıdar Ospanalıev/ - «Ortalyq saılaý komıssııasy óz qyzmetin ashyq, jarııaly túrde jáne QR Prezıdentiniń kezekten tys saılaýyna qyzyǵýshylyq tanytqan barlyq mekemelermen birlesken túrde júrgizýde.
Sondaı-aq OSK óz qyzmetin «QR Saılaý týraly» zańynyń aıasynda ǵana atqarýda»,-dedi búgin Ortalyq saılaý komıssııasynyń hatshysy Baqyt Meldeshov jýrnalıstermen bolǵan brıfıngte
Onyń sózine qaraǵanda, OSK saılaý barysy týraly aqparattardy jedel túrde buqaralyq aqparat quraldary men elimizde tirkelgen sheteldik baıqaýshylarǵa jáne saıası partııalar men qoǵamdyq birlestikterge jetkizip otyrady. «Búginde bizdiń «Saılaý týraly» zańymyzda saılaýda halyqaralyq baıqaýshylar tarapynan qadaǵalaý máselesi qarastyrylǵan. Osyǵan qaraı QR Prezıdentiniń kezekten tys saılaýyn 1 myń 59 baıqaýshy qadaǵalap otyr. Sonymen qatar elimizdiń Syrtqy ister mınıstrliginde taǵy 212 jýrnalıst tirkelgen. Osylardyń barlyǵyn tolyqtyra kelgende Qazaqstandaǵy kezekten tys prezıdenttik saılaýdy 1 myń 271 baıqaýshy qadaǵalap otyr deýge bolady. Buǵan qosa, saılaýdyń barysyn Prezıdentikke kandıdattardyń senimdi ókilderi men eldegi saıası partııalar men úkimettik emes uıymdardyń atynan ókildik etetin otandyq baıqaýshylar da baqylap otyr. Bizde otandyq baıqaýshylar jóninde naqty málimet joq. Osyǵan deıingi saılaýlardaǵy tájirıbeni eskeretin bolsaq, olardyń sany 30 myńǵa jýyqtaıdy dep topshylaýǵa bolady»,-dedi OSK hatshysy.
Onyń paıymdaýynsha, atalǵan máselelerdi nazarǵa alǵanda saılaý protsedýralarynyń ashyqtyǵy qamtamasyz etilip otyr. Al daýys berý sharasy tynysh ári turaqty ótip jatyr. «Elektrondy buqaralyq aqparat quraldarynda jarııalanǵan materıaldardyń monıtorıngine taldaý jasasaq, elimizdiń barlyq aımaqtaryndaǵy saılaý komıssııalary uıymdasqan túrde qyzmet ete bildi. Al saılaýshylardyń belsendiligine baıqaýshylar oń baǵasyn berip otyr. OSK-na osy daýys berý kúninde qandaı da bir zańbuzýshylyqtarǵa qatysty shaǵymdar kelip túsken joq»,-dedi B.Meldeshov.
