QR Prezıdentiniń kezekten tys saılaýyn baqylaý úshin 850-den astam shetel azamaty tirkeletin bolady - OSK
ANA. 21 aqpan. QazAqparat /Asqar Bımendın/ - 3 sáýirde ótetin kezekten tys Prezıdenttik saılaýdy baqylaýǵa Qazaqstanǵa 850-den astam sheteldik baqylaýshy keledi dep boljap otyr.
Bul týraly QR Prezıdentiniń kezekten tys saılaýyn ótkizý men daıyndyq jumystaryn uıymdastyrý máseleleri jóninde ótken búgingi respýblıkalyq semınar-keńes barysynda Ortalyq saılaý komıssııasynyń múshesi Tatıana Ohlopkova málim etti.
«Ózderińiz biletindeı, qazirgi tańda EQYU men TMD-nyń Demokratııalyq ınstıtýttar men adam quqyqtary jónindegi bıýrosynyń (DIAQB) mıssııasy qalyptasyp jatyr. Ǵalamtorda EQYU/DIAQB mıssııasynyń kútilip otyrǵan músheler sany 436 adamdy, onyń ishinde uzaq merzimdi baqylaýshylar sany 36 adamdy quraıdy, bul sandardan basqa TMD tarapynan da baqylaýshylar mıssııasy bolady degen aqparat jarııalanǵan», - dedi T.Ohlopkova.
Ol sondaı-aq sheteldik baqylaýshylardy akkredıtatsııadan ótkizýdiń bir sharty Qazaqstan Respýblıkasynyń shaqyrýy bolyp tabylatyndyǵyn eske saldy. «4 aqpan kúni Ortalyq saılaý komıssııasy QR Memlekettik hatshysy-Syrtqy ister mınıstri Qanat Saýdabaevqa halyqaralyq baqylaýshylar ınstıtýtynyń ashylǵandyǵy týraly hat joldady. Sheteldik baqylaýshylardy tirkeý 7 aqpan kúni bastalǵan, 28 naýryz kúni aıaqtalady», - dep atap ótti ol.
Sonymen qatar QR Ortalyq saılaý komıssııasynyń múshesi «Qazaqstanda halyqaralyq baqylaý ınstıtýty ashylmaǵan bir de bir saılaý naýqany ótpegenin» atap ótti.
Jáne de ol 2005 jyldyń 4 jeltoqsany kúni ótken QR Prezıdentiniń saılaýynda 1634 halyqaralyq baqylaýshylar men sheteldik BAQ ókilderi tirkelgenin eske salyp ótti.
