QR Prezıdentiniń Qazaqstan halqyna arnalǵan Joldaýynyń negizgi basymdyqtaryn túsindirý jónindegi respýblıkalyq keńes ótti

«Búkil dúnıejúzin qarjy daǵdarysy qyspaqqa alyp, Batystyń eń damyǵan elderinde áleýmettik salaǵa bólinetin qarjy barynsha qysqartyp jatqanda Elbasymyzdyń Joldaýy arqasynda bizdiń elimizde densaýlyq saqtaý, bilim berý, halyqty jumyspen qamtý salalaryna bólinetin qarjy mólsheri eselep artyp otyr. Joldaýǵa sáıkes respýblıkalyq bıýdjetten orasan zor qarajat bólinýde. Munyń bárin biz Elbasymyzdyń árbir qazaqstandyqqa jasaǵan qamqorlyǵy retinde qabyldaýymyz kerek jáne sizder ony óz óńirlerińizdiń árbir turǵynyna uǵynyqty tilmen túsindirip, jetkizýlerińiz qajet», - dep atap ótti jıynda sóz alǵan QR Memlekettik hatshysy Muhtar Qul-Muhammed.

Keńeske QR Prezıdenti Ákimshiligi basshysynyń orynbasary Baǵlan Maılybaev, QR Bilim jáne ǵylym mınıstri Baqytjan Jumaǵulov, Eńbek jáne halyqty áleýmettik qorǵaý mınıstri Gúlshara Ábdiqalyqova, Mádenıet jáne aqparat mınıstri Darhan Myńbaı, barlyq oblys ákimderiniń orynbasarlary, respýblıkalyq buqaralyq aqparat quraldarynyń basshylary, úkimettik emes uıymdardyń ókilderi qatysty.