QR Prezıdentiniń Germanııaǵa sapary eki el arasyndaǵy yntymaqtastyqqa oń áserin tıgizdi – Gıýnter Knabe

BERLIN. QazAqparat – Ortalyq Azııa elderine mamandanǵan nemis saıasattanýshysy Gıýnter Knabe Qazaqstan Prezıdentiniń Germanııaǵa resmı sapary týraly pikir bildirdi, dep habarlaıdy QazAqparattyń menshikti tilshisi.

Qasym-Jomart Toqaev 5-6 jeltoqsanda Berlın qalasynda GFR basshysymen, belgili nemis saıasatkerlerimen jáne bıznes ókilderimen kezdesti.

«Berlın Eýrazııalyq klýbynda Qasym-Jomart Toqaevtyń nemis bıznesmenderimen kezdesýi sátti ótti», - dep jazdy Gıýnter Knabe «QazAqparat» HAA-nyń suraý hatyna.

Juma kúni Berlın Eýrazııalyq klýbynyń 28-shi otyrysynda Memleket basshysy nemis bıznesi úshin erekshe jaǵdaı jasalǵanyn málimdegen bolatyn.

«Otyrysqa qatysqan 400-ge jýyq adamnyń kópshiligi – nemis kásipkerleri. Olar el Prezıdentinen búgingi Qazaqstan týraly, Germanııanyń ekonomıkalyq máseleleri men múmkindikteri týraly aqparat aldy», - dep atap ótti saıasattanýshy.

Qazaqstan basshysy nemis bıznesin el ekonomıkasyna salynatyn ınvestıtsııany arttyrýǵa shaqyrdy.

«Qasym-Jomart Toqaevtyń kezdesýleri Germanııanyń Qazaqstandaǵy aldaǵy ekonomıkalyq qyzmetine aıtarlyqtaı oń áserin tıgizedi», - deıdi sarapshy.

Eki kúndik sapar barysynda jalpy somasy 2,4 mıllıard dollardy quraıtyn 30 qazaq-german ekonomıkalyq qujatyna qol qoıyldy.

«Germanııa ekonomıkasy Qazaqstannyń mańyzyn moıyndaıdy jáne oǵan artyp kele jatqan qyzyǵýshylyqty kórsetedi», - dep sózin qorytyndylady sarapshy.

Avtor: Tımýr Dúısekeev

Foto: www.dw.com