QR Prezıdentiniń erekshe ókili retinde IYU sammıtine Beıbit Atamqulov qatysady

NUR-SULTAN. QazAqparat - QR Syrtqy ister mınıstri Beıbit Atamqulov 31 mamyr -1 maýsym aralyǵynda Mekke qalasynda ótetin Islam yntymaqtastyq uıymynyń XIV sammıtine qatysady. Bul týraly búgin ótken brıfıng barysynda QR SІM resmı ókili Aıbek Smadııarov málim etti, dep habarlaıdy QazAqparat tilshisi.

Joǵary deńgeıdegi forýmǵa memleket jáne úkimet basshylary, Islam yntymaqtastyq uıymyna múshe memleketterdiń 56 syrtqy ister mınıstrleri, sondaı-aq Islam damý bankiniń basshylyǵy keletini kútiledi. Qazaqstannyń Syrtqy ister mınıstri atalmysh basqosýǵa QR Prezıdentiniń erekshe ókili retinde qatyspaq.

«Sammıt qarsańynda delegatsııa basshylary qol qoııatyn Qorytyndy kommıýnıke men Palestınaǵa qatysty rezolıýtsııa mátinderin talqylaıtyn Aǵa laýazymdy tulǵalar jáne syrtqy ister mınıstrleriniń otyrystary josparlanýda. Sondaı-aq sammıttiń kún tártibine palestınalyq másele, Al-Kýds Al-Sharıf mártebesi jáne Taıaý Shyǵystaǵy beıbit kelissózderge qolǵabys kórsetý, halyqaralyq terrorızmmen, ıslamofobııamen kúresý, kedeıshilikti joıý jáne Islam yntymaqtastyq uıymyna múshe-memleketterdegi turaqty damýdy qamtamasyz etý máseleleri enetin bolady», - dedi A.Smadııarov.

Qazaqstan syrtqy saıası vedomstvosynyń basshysy Beıbit Atamqulov atalǵan taqyryptardan bólek, QR Tuńǵysh Prezıdenti - Elbasy Nursultan Nazarbaevtyń Islamdyq tatýlasý, Islam yntymaqtastyq uıymy sheńberindegi ǵylymı-tehnologııalyq áleýetti jáne azyq-túlik qaýipsizdigin damytý sekildi bastamalaryn iske asyrýdaǵy aldaǵy qadamdar, sondaı-aq jýyrda Beıjiń qalasynda ótken «Bir beldeý, bir jol» halyqaralyq yntymaqtastyq forýmy barysynda tanystyrǵan «Úsh D» jańa bastamasy sııaqty negizgi máseleler jóninde aıtatyn bolady.