QR Prezıdentiniń BUU QK alańynda joldaǵan úndeýi máselelerdi sheshýdiń tıimdi jolyn usynady - Sadovnıchıı
MÁSKEÝ. QazAqparat - Qazaqstan tarapy Birikken Ulttar Uıymy Qaýipsizdik Keńesiniń turaqty emes múshesi retinde alǵash ret onyń ashyq pikir-talasyna qatysty.
Máskeý memlekettik ýnıversıtetiniń rektory Vıktor Sadovnıchıı BUU ashyq pikirtalasy kezinde QR syrtqy ister mınıstri Qaırat Ábdirahmanov tanystyrǵan Qazaqstan Respýblıkasynyń Prezıdenti Nursultan Nazarbaevtyń «Qaýipsiz, ádil jáne gúldengen álem qurý úshin jahandyq áriptestikti nyǵaıtýǵa qazaqstandyq tujyrymdamalyq kózqaras» atty saıası úndeýine qatysty óz pikirin bildirdi.
«Qazaqstan Prezıdenti ótken jyldar ishinde ylǵı da qysyltaıań shaqtarda sóz sóılep, ylǵı da ony sheshýdiń tıimdi joldaryn usynyp keldi», - dedi Sadovnıchıı.
MMÝ rektory Qazaqstan basshylyǵynyń Sırııa máselesi boıynsha kelissózder ótkizý úshin alań usynyp otyrǵandyǵyn joǵary baǵalady.
«Eń kúrdeli máselelerdiń biri - Sırııa máselesi Astanada talqyǵa túskeli turǵany Prezıdenttiń eleýli eńbeginiń arqasy dep sanaımyn. Onyń ár isi óziniń tájirıbesi men danalyǵynan bastaý alady. Ol halyqaralyq qatynastardyń túıtkildi tustaryn jete túsinedi», - deıdi Sadovnıchıı.
