QR Prezıdentiniń bastamasyna oraı BUU Bas assambleıasy joǵary deńgeıde kezdesý ótkizedi
ASTANA. QazAqparat - QR Prezıdenti Nursultan Nazarbaevtyń bastamasyna oraı BUU Bas assambleıasy alǵash ret joǵary deńgeıde kezdesý ótkizedi. Bul týraly búgin elordada ótip jatqan «Ótkendi eske alyp, bolashaqqa kóz tik» atty halyqaralyq konferentsııada QR Syrtqy ister mınıstri Qaırat Ábdirahmanov aıtty, dep habarlaıdy QazAqparat tilshisi.
«Búgin biz Qazaqstan Prezıdenti Nursultan Nazarbaevtyń bastamasymen BUU Bas assambleıasy jarııa etken 29 tamyz Halyqaralyq ıadrolyq synaqtarǵa qarsy is-qımyl kúninde bas qosyp otyrmyz. Qazaqstan úshin bul kúnniń nyshandyq máni bar. Bul kún ıadrolyq synaqtardyń qasiretti saldaryn eske alý úshin ǵana emes, sonymen birge pikirles memleketterdiń, azamattyq qoǵam ókilderi men jekelegen tulǵalardyń kúsh-jigerin ıardolyq qaýip-qaterden azat bolashaq qurý maqsatyna toptastyrady», - dedi mınıstr.
Onyń atap ótýinshe, ıadrolyq synaqtardyń jantúrshigerlik sátteri esh ýaqytta umytylmaýy tıis.
«Jyldan jylǵa bul data, 29 tamyz barynsha tanymaldyqqa ıe bolyp keledi. Ótken jyly Astanada Pagýosh konferentsııasy ótip, MAGATE-niń Tómen baıytylǵan ýran banki iske qosyldy. Osy jyldyń 6 qyrkúıeginde BUU Bas assambleıasy 29 tamyzǵa arnalǵan joǵary deńgeıdegi birinshi kezdesýge jınalatyn bolady», - dep jalǵady sózin Qaırat Ábdirahmanov.
Osy rette ol ıadrolyq synaqtardyń saldarynan qaza tapqan barlyq adamzat balasyn bir mınýt únsizdikpen eske alýǵa shaqyrdy. Halyqaralyq jıyn qatysýshylary ıadrolyq synaqtan qaza tapqandardy bir mınýt únsizdikpen eske aldy.
