QR Prezıdentiniń bastamasymen qolǵa alynǵan reformalardy qoldaýǵa daıynbyz – Mattıas Lıýtenberg

NUR-SULTAN. QazAqparat – Búgin GFR-diń Shyǵys Eýropa, Kavkaz jáne Ortalyq Azııa elderimen yntymaqtastyq máseleleri jónindegi ýákili Mattıas Lıýtenberg bastaǵan delegatsııa elordaǵa keldi, dep habarlaıdy QazAqparat tilshisi.

«Búgin Germanııa Federatıvtik Respýblıkasy men Qazaqstan Respýblıkasy arasynda dıplomatııalyq qatynastyń ornaǵanyna 30 jyl tolýyn atap ótip otyrmyz. Verbaldyq notalardy almasýdan bastalyp, qazirgi tańda kópqyrly jáne qarqyndy qarym-qatynasqa aınaldy. Jeke ózim osy is-sharaǵa baılanysty Qazaqstannyń astanasy Nur-Sultanda bolǵanyma óte qýanyshtymyn. Mınıstrdiń orynbasary myrza, jańa ǵana jasalǵan syndarly jáne dostyq kelissóz úshin rahmet. Mereıtoı bizge yntymaqtastyq deńgeıine oń baǵa berýge, sondaı-aq bolashaqqa senimmen qaraýǵa múmkindik beredi. Germanııa Qazaqstannyń táýelsizdigin moıyndaǵan alǵashqy elderdiń biri boldy. Bizge Ortalyq Azııadaǵy jańa memleketterdiń táýelsizdigine belsendi qoldaý kórsetý mańyzdy boldy», - dedi Mattıas Lıýtenberg BAQ-tyń qatysýymen ótken baspasóz máslıhatynda.

Onyń aıtýynsha, 30 jyldyń ishinde eki el arasynda senimdi qarym-qatynas ornaǵan.

«Qazaqstan Prezıdenti Qasym-Jomart Toqaevtyń bastamasymen, onyń ishinde qazirgi ýaqytta Qazaqstannyń aldynda turǵan kúrdeli syn-tegeýrinderdi jáne qolǵa alynǵan reformalar protsesin súıemeldeýge jáne qoldaýǵa daıynbyz. Biz demokratııanyń nyǵaıýy men qoǵamnyń jańǵyrýy Qazaqstan halqynyń bolashaǵyna oń áser etetinine senimdimiz. Germanııa Qazaqstandy óńirdegi jáne halyqaralyq forýmdardaǵy mańyzdy bastamashy retinde, óńirlik yntymaqtastyq máseleleri boıynsha, sondaı-aq klımattyń ózgerýi sekildi halyqaralyq problemalar boıynsha áriptes retinde baǵalaıdy», - deıdi ol.