QR Prezıdentiniń baspasóz hatshysy D.Abaev Aqordanyń Facebook paraqshasyndaǵy onlaın-brıfıngte alǵashqy suraqqa jaýap berdi
ASTANA. QazAqparat - Memleket basshysy Nursultan Nazarbaevtyń baspasóz hatshysy Dáýren Abaev Aqordanyń Facebook jelisindegi paraqshasynda onlaın-brıfıngte kelip túsken alǵashqy suraqqa jaýap berdi.
Alǵashqy saýal KazTAG jýrnalısterinen kelip tústi: «Reseı Federatsııasynyń Prezıdenti Vladımır Pýtın Qazaqstan Respýblıkasynyń Prezıdenti Nursultan Nazarbaevqa Reseıdiń basqarýyndaǵy IM lańkesterine qarsy kúresetin antıterrorıstik koalıtsııaǵa Qazaqstannyń kirýi jóninde usynys jasady ma? Elbasynyń atalǵan másele boıynsha ustanymy qandaı bolmaq?»
Dáýren Abaevtyń jaýaby: «Biz biletindeı, Vladımır Pýtın halyqaralyq qoǵamdastyqtyń barlyq elderine aýqymdy antıterrorıstik koalıtsııa qurýdy usynǵany belgili, Qazaqstanǵa jekeleı usynys túspedi.
Bul másele boıynsha elimizdiń ustanymyna keler bolsaq, ony Nursultan Ábishuly BUU Bas Assambleıasynyń 70-shi sessııasynda jarııa etken bolatyn. Biz BUU janynan halyqaralyq terrorızm men ekstremızmge qarsy kúrestiń álemdik biryńǵaı jelisin qurýdy usyndyq. Bul mindetti júzege asyrý úshin lańkestikke qarsy kúres boıynsha barlyǵyn qamtıtyn BUU qujatyn ázirlep, qabyldaý kerek».
