QR Prezıdentiniń Arnaıy ókili Londonda brıtandyq áriptesterimen kezdesti
22-23 shilde aralyǵynda oryn alǵan sapardyń aıasynda E. Qazyhan Ulybrıtanııa Premer-mınıstriniń Qazaqstan boıynsha Saýda ókili Baronessa Emma Nıkolsonmen, BUU Klımattyń ózgerýi jónindegi 26-shy konferentsııasynyń (SOR26) máseleleri boıynsha Ortalyq Azııaǵa jaýapty óńirlik Elshisi Devıd Moranmen, Qazaqstanmen yntymaqtastyq jónindegi Jalpypartııalyq parlamenttik toptyń tóraǵasy Bob Stıýartpen, Shyǵys Eýropa jáne Ortalyq Azııa boıynsha qyzmet atqaratyn Forın-ofıstiń basshylyǵymen, sondaı-aq Qurama Koroldiktiń Parlamentindegi Qaýymdastar jáne Lordtar palatalarynyń birqatar depýtattarymen kezdesýler ótkizdi. Kezdesýler barysynda ekijaqty jáne kópjaqty formattaǵy yntymaqtastyqtyń ózekti jáne perspektıvaly máseleleri, sondaı-aq aldaǵy joǵarǵy jáne joǵary deńgeıdegi saparlar, joǵary laýazymdy qazaqstandyq delegatsııanyń Ulybrıtanııanyń Glazgo qalasynda ótetin SOR26 klımattyq sammıtine qatysýy, Qazaqstan-Brıtan strategııalyq dıalogynyń, Іskerlik keńesiniń jáne Saýda-ekonomıkalyq yntymaqtastyq jónindegi úkimetaralyq komıssııasynyń kezekti otyrystary talqylandy.
E. Qazyhan brıtandyq áriptesterdi Qazaqstanda júzege asyrylyp jatqan saıası jáne ekonomıkalyq reformalar baǵdarlamasynyń aǵymdaǵy jumysy men strategııalyq damý úrdisterimen tanystyrdy. Otandyq dıplomat Prezıdent Qasym-Jomart Toqaevtyń, «halyq únine qulaq asatyn memleket» tujyrymdamasyna sáıkes, elimizdegi jańǵyrtý ózgeristerin odan ári júzege asyrý baǵytynan taımaıtynyn erekshe atap ótti. Óz kezeginde brıtandyq áriptester QR basshylyǵynyń reformalar baǵdarlamasyn jalǵastyrý jáne tereńdetý jónindegi josparlaryn quptap, Ulybrıtanııanyń Qazaqstanmen strategııalyq áriptestikti odan ári damytýǵa beıildiligin rastady.
Brıtandyq tarap sondaı-aq aǵylshyn quqyǵynyń qaǵıdattary men normalaryna sáıkes áreket etetin «Astana» Halyqaralyq qarjy ortalyǵynyń tabysty damýy eki memleket arasyndaǵy tıimdi yntymaqtastyqtyń mańyzdy jetistikteriniń biri bolǵanyn erekshe atap ótti. Kezdesýlerdiń nátıjesinde taraptar talqylanyp jatqan máselelerdiń aýqymdy kesheni boıynsha ózara túsinistikke qol jetkizdi, sonymen qatar saýda jáne ınvestıtsııalar, «jasyl» energetıka men klımattyq ózgeristerge qarsy kúresý, óńirlik jáne jahandyq qaýipsizdik salalaryndaǵy ózara is-qımyldy qosa alǵanda, ekijaqty qatynastardyń barlyq spektri boıynsha uzaq merzimdi seriktestikti odan ári nyǵaıtýǵa nıetti ekendigin rastady.
