QR Prezıdentiniń Arhıvi Elektrondy arhıv qurýda
ASTANA. QazAqparat - Qazaqstan Respýblıkasy Prezıdentiniń Arhıvi óndiristik qyzmetin tolyqtaı modernızatsııalaýǵa jáne Elektrondy arhıv qurýǵa kiristi. Qazaqstan Respýblıkasy Prezıdenti Arhıviniń dırektory, tehnıka ǵylymdarynyń doktory, professor Borıs Japarovtyń aıtýynsha, qazirgi ýaqytta Arhıvte Aqparattandyrý Kontseptsııasy men Baǵdarlamasy tolyq keshende júzege asyrylýda, ıaǵnı Ulttyq arhıv qory qujattaryn jappaı tsıfrleý jumystary júrgizilýde. Sondaı-aq, zertteýshiler úshin «vırtýaldy oqý zalynyń» aqparattyq qurylymy men modeli qurylǵan.
Esterińizge sala keteıik, Qazaqstan Respýblıkasy Prezıdentiniń Arhıvi memleket Basshysynyń jarlyǵymen 1994 jyly qurylǵan bolatyn. Atalǵan arhıv Qazaqstan Respýblıkasy Prezıdentiniń, onyń Ákimshiliginiń jáne memleket basshysyna tikeleı baǵynatyn basqa da memlekettik organdardyń qyzmetin aqparattyq-arhıvtik qamtamasyz etý salasynda negizgi mindetterdi atqarady.
Arhıvtiń 2021 jylǵa deıingi josparynda 1 kategorııaǵa jatatyn arhıv isterin ıaǵnı, asa qundy jáne zertteýshiler tarapynan suranysqa ıe tarıhı qujattardy tsıfrlik formatqa kóshirý maqsaty tur. Bundaı isterdiń jalpy sany 160 myń birlik. Qazirgi tańda arhıvte 62 myń saqtaý birlikteri sandyq formatqa kóshirildi. Bul barlyq materıaldardyń 37 paıyzyn quraıdy. Aıta keteıik, arhıvte barlyǵy 789 myń materıal birligi saqtalýda. Oǵan qosa, bunda jyl saıyn 7 myńǵa jýyq saqtaý birligi qabyldanyp turady. Qazaqstan Respýblıkasy Prezıdentiniń Arhıviniń basty ereksheligi, maqtanyshy -bunda 1917-2013 jyldar aralyǵyn qamtıtyn qujattar saqtalýda.
Osy rette aıta keteıik, 1994 jyldan bastap, osy ýaqytqa deıin arhıvtiń Oqyrman zalynda 5,3 myńnan astam izdenýshi jumys istedi. Sebebi, Arhıvtegi qujat sany men sapasy joǵary. Qazaq AKSR-niń qurylýy, totalıtarlyq rejım kezeńindegi kúshtep ujymdastyrý men saıası qýǵyn-súrginge ushyratý, ólkeni ındýstrııalandyrý, qýǵyn-súrginge ushyraǵan halyqtardy Qazaqstanǵa jer aýdarý tarıhy, Uly Otan soǵysy jyldaryndaǵy Qazaqstan, tyń jáne tyńaıǵan jerlerdi ıgerý týraly qujattar Arhıvte saqtaýda bar.
Arhıvtegi oqyrman zalynda otandyq jáne shet eldik zertteýshiler jumys jasaıdy: onyń ishinde Reseıden, Ýkraınadan, Armenııadan, Ózbekstannan, AQSh, Ulybrıtanııadan, Kanada, Germanııa, Japonııa, Frantsııa, Italııa, Polsha jáne Rýmynııadan keledi.
Sonymen qatar, zaman talaptaryna saı, QR Prezıdenti Arhıviniń www.archive.president.kz siltemesi boıynsha resmı veb-saıty qyzmet etedi. Saıtta 33 vırtýaldyq tarıhı-qujattyq kórmelermen tanysýǵa bolady. Oǵan qosa, «Ekinshi dúnıejúzilik soǵystyń qazaqstandyq áskerı tutqyndary» atty respýblıkalyq derekter bazasy da bar. Bul derekter bazasy www.tutkyn.kz degen ataýmen onlaın nusqada qoljetimdi. Sondaı-aq, www.asharshylyq.kz siltemesi boıynsha, «Qazaqstandaǵy 1930 jyldarǵy asharshylyq: qujattar men faktiler» asharshylyq qurbandary esimderin tarıhqa qaıtarý maqsatynda, derekter arqyly anyqtalǵan bastapqy qurbandar esimderi ornalastyryldy.
Halyqaralyq tájirıbe almasý maqsatynda, 2015-2017 jyldarda Arhıvtiń qyzmetkelerleri Reseı, Germanııa, Ońtústik Koreıa jáne AQSh-tyń aldyńǵy qatarly arhıvteriniń qyzmetimen tanysty. Olar damyǵan memleketterde arhıv júrgiázý qyzmetiniń aldyńǵy qatarly tehnologııalaryn meńgerdi. Al bıyl qazan aıynda QR Prezıdentiniń Arhıvinde Arhıvterdi aqparattandyrý máselelerine arnalǵan Halyqaralyq ǵylymı-tájirıbelik konferentsııa ótedi.
Esterińizge sala keteıik, ústimizdegi jyldyń qańtarynda Arhıvtiń 2017-2019 jyldarǵa arnalǵan Aqparattandyrý baǵdarlamasy bekitildi.
