QR Prezıdentine Kýrchatovqa ǵylym qalashyǵy mártebesin berý usynysy jasaldy

ÓSKEMEN. QazAqparat – Abaı oblysynyń Kýrchatov qalasynda ǵylymı ýnıversıtet ashylady. Bul týraly búgin Abaı oblysynyń ákimi Nurlan Uranhaev Kýrchatov turǵyndarymen kezdesýde aıtty, dep habarlaıdy QazAqparat tilshisi.

Óńir basshysy halyqty tolǵandyrǵan suraqtarǵa da jaýap berdi. Atap aıtqanda, qala turǵyndary JEO salý, joldardy abattandyrý jáne Kýrchatovqa ǵylym qalasy mártebesin berý máselelerin qozǵady.

«Men jaǵdaıdy jaqsy bilemin. JEO qurylysy josparda bar. Jylýmen qamtý máselesi ótkir. Biz osy baǵytta jumys istep jatyrmyz. Sizderdi jylýsyz qaldyrmaımyz. Sondaı-aq AES salý máselesi de sheshilýde. Men Memleket basshysymen kezdesýde Kýrchatovqa ǵylym qalashyǵy mártebesin berý týraly usynys aıttym. Osynda ǵylymı ýnıversıtettiń ashylýy kútilýde. Qaladaǵy búkil ınfraqurylymdy qalpyna keltirý kerek», - dedi oblys ákimi.

Nurlan Uranhaevtyń aıtýynsha, Kýrchatov qalasynda keleshekte arnaıy ǵylymı top qurylyp, ýnıversıtettiń baǵdary týraly kelissóz ótkiziledi.