QR Prezıdentine avtomobıl jasaý salasynyń damýy jóninde baıandaldy

ALMATY. QazAqparat - Memleket basshysy «Astana Group» kompanııalar tobynyń prezıdenti Nurlan Smaǵulovty qabyldady, dep habarlaıdy QazAqparat Aqordanyń baspasóz qyzmetine  silteme jasaı otyryp.

Kezdesý barysynda Nurlan Smaǵulov Nursultan Nazarbaevqa avtomobıl jasaý salasynyń damýy men avtomobılderdi eksportqa shyǵarý jóninde baıandady.      

«Satylǵan avtomobılderdiń kólemi artyp kele jatqany baıqalady. Avtomobıl jasaý mekemelerinde «Maz» kóligin qurastyra bastadyq.  Almatydaǵy zaýyt «Hyundai» mashınasyn boıaýǵa jáne dánekerleýge tolyqtaı kóshti. Reseı Federatsııasyna 450 avtomobıldi eksporttadyq, Tájikstanǵa 300 «Hyundai County» avtobýsyn jasap, jóneltý jóninde kelisimge keldik. Mundaı operatsııalardy Ózbekstanmen de júzege asyramyz degen oıdamyz. Osylaısha, Qazaqstan óndiris alańy retinde Ortalyq Azııada  mańyzdy ról atqara bastady», - dep qorytyndylady kompanııa basshysy.

Kezdesý sońynda Nursultan Nazarbaev Nurlan Smaǵulovty memlekettik, óndiristik, áleýmettik-mádenı jáne qoǵamdyq qyzmettegi erekshe eńbegi úshin ІІ dárejeli «Barys» ordenimen marapattady.