QR Prezıdentine «ArselorMıtall Temirtaý» kompanııasynyń 2020 jylǵy jumysy baıandaldy
NUR-SULTAN. QazAqparat - Memleket basshysy Qasym-Jomart Toqaev «ArselorMıtall» kompanııasynyń basqarma tóraǵasy Lakshmı Mıttalmen kezdesý ótkizdi, dep habarlaıdy QazAqparat Aqordanyń resmı saıtyna silteme jasap.
Prezıdentke «ArselorMıtall Temirtaý» kompanııasynyń 2020 jylǵy jumysynyń nátıjeleri men 2021 jylǵa arnalǵan josparlary týraly aqparat berildi.
Kezdesý barysynda óndiristerdi jańǵyrtý, ekologııalyq ahýaldy jaqsartý, óndiriletin ónim túrlerin keńeıtý máseleleri talqylandy.
Memleket basshysy óndiris qýatyn jańǵyrtýǵa jáne arttyrýǵa tartylatyn ınvestıtsııalar kólemin ulǵaıtý qajettigin aıtty. Keme jasaý, avtokólik ónerkásibi jáne elektrotehnıkalyq óndiris salalary boıynsha jańa taýarlar shyǵarý mańyzdy mindet bolýy kerek.
Áńgimelesý barysynda taraptar atmosferaǵa bólinetin qaldyqtardy azaıtý, onyń ishinde, agloónerkásipte, konvertorlarda, koksohımııalyq óndiris pen JEO-2-de ekologııalyq jabdyqtardy jańǵyrtýǵa qatysty kompanııanyń josparlaryna erekshe kóńil bóldi.
Qasym-Jomart Toqaev óndiristegi jaraqat alý jaǵdaılaryn azaıtý, kompanııanyń sheteldik jáne otandyq jumysshylary arasyndaǵy eńbekaqy kóleminiń alshaqtyǵyna jol bermeý boıynsha tapsyrma berdi.
Beınebaılanys formatynda ótken kezdesýge Premer-Mınıstrdiń orynbasary Roman Sklıar, Prezıdent Ákimshiligi basshysynyń orynbasary Tımýr Súleımenov, Qaraǵandy oblysynyń ákimi Jeńis Qasymbek qatysty.
