QR Prezıdentine «Abu Dhabi Plaza» kesheniniń qurylysy ýaqytynda aıaqtalady dep ýáde berdi
ÁBÝ DABI. QazAqparat - Qazaqstan Prezıdenti Qasym-Jomart Toqaev «Aldar Properties» kompanııasy Dırektorlar keńesiniń tóraǵasy Muhammed Ál Múbárakpen kezdesti, dep habarlaıdy QazAqparat Aqordanyń baspasóz qyzmetine silteme jasap.
Memleket basshysy «Aldar Properties» kompanııasy Dırektorlar keńesiniń tóraǵasy Muhammed Ál Múbárakpen kezdesý ótkizdi.
Muhammed Ál Múbárak Qasym-Jomart Toqaevqa atalǵan kompanııanyń iske asyryp jatqan «Abu Dhabi Plaza» jobasynyń qazirgi jaǵdaıy, Nur-Sultan qalasyndaǵy kópfýnktsıonaldy keshenniń qurylysyn belgilengen ýaqytta aıaqtaý úshin atqarylyp jatqan qosymsha jumystar týraly baıandady.
Qazaqstan Prezıdenti elimizdegi eń iri qurylys nysandarynyń biri sanalatyn jobanyń ýaqytyly aıaqtalyp, halyq ıgiligine beriletinine senim bildirdi.
Sonymen qatar Memleket basshysy áńgimelesý barysynda týrızm ındýstrııasyndaǵy yntymaqtastyqtyń áleýetine nazar aýdardy.
Qasym-Jomart Toqaev Qazaqstanda basymdyqqa ıe on týrıstik baǵyttyń anyqtalǵanyn atap ótip, olardy álemdik deńgeıdegi barlyq qajetti týrıstik ınfraqurylymmen qamtamasyz etý josparlanyp otyrǵanyn aıtty. Onyń aıtýynsha, atalǵan salaǵa memlekettik qoldaý kórsetý sharalary, onyń ishinde, salyqtyq jeńildikter, bazalyq ınfraqurylymmen qamtamasyz etý jumystary júrgizilýde.
