QR Prezıdentin saılaý kezinde Astanada 170 astam ashyq saılaý ýchaskesi jumys isteıdi
ASTANA. QazAqparat - Astana qalasynyń aýdandyq ákimdikterinde Qazaqstan Respýblıkasynyń Prezıdentin saılaýǵa qatysatyn saılaýshylar tizimin quraý boıynsha arnaıy shtabtar jumys isteıdi. Atalmysh tizimderdi qurastyrýmen belgilengen komıssııa aınalysady, dep jazylǵan elorda ákimdiginiń resmı saıtynda.
Shtab qyzmetkerleri aýdan turǵyndarynyń arasyndaǵy elektoraldy jastaǵy saılaýshylar tizimin jasaıdy, tizimder naýryz aıynda saılaýshylar tizimin anyqtaý maqsatynda páter aralaý naýqany kezinde qurastyryla bastady. Aýdandyq mekemeler men kásiporyndar shtabqa saılaýǵa qatysatyn óz qyzmetkerleriniń tizimin de berýde.
«Búgingi tańda Esil aýdanynda turatyn elektoraldy jastaǵy saılaýshylardyń sany 34456 adamdy quraıdy. Jalpy, aýdanda 15 ashyq jáne 8 jabyq saılaý ýchaskesi jumys isteıdi. Qazir 15 ýchaske boıynsha saılaýshylar tizimin daıarlaý jumystary júrgizilýde, 5 sáýirde saılaý komıssııasyna tizimdi berýimiz kerek, olar tizimdi akti boıynsha qabyldaıdy, - dedi «Esil» aýdany áleýmettik sala jáne kásipkerlik bóliminiń basshysy Araılym Elimsarına.
Onyń aıtýynsha, saılaýǵa densaýlyq jaǵdaıy boıynsha qatysa almaıtyn tulǵalar úıden daýys bere alady. Ol úshin saılaý kúni saǵat 12:00 deıin ótinish jazý kerek.
«Almaty» aýdany ákimdiginiń málimetinshe, aýmaqta 96 saılaý ýchaskesi jumys isteıdi, saılaýshylar tiziminde 194 990 adam tirkeldi. Al «Saryarqa» aýdanynda 60 ashyq jáne 10 jabyq saılaý ýchaskesi ashylǵan, saılaýshylar tizimine 153 987 adam engizilgen.
Qazaqstan Respýblıkasynyń Prezıdentin saılaý 26 sáýirde ótedi. Turǵyndar barlyq saýaldar boıynsha Astana qalasy ákimdiginiń baılanys ortalyǵyna 55-66-55 telefony boıynsha habarlasa alady.
