QR Prezıdenti: Júzege asqan jobalardyń áleýmettik-ekonomıkalyq tıimdiligine taldaý jasalady

Bul týraly Tótenshe jaǵdaı rejımin qamtamasyz etý jónindegi Memlekettik komıssııanyń qorytyndy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Biz «Jumyspen qamtýdyń jol kartasy» baǵdarlamasyn júzege asyrýǵa 1 trıllıon teńgege jýyq qarjy bólip otyrmyz. Bul – qomaqty qarajat. Ony shaǵyn bıznesti nesıeleýge de paıdalanýǵa bolady. Sonyń bári quzyrly oryndardyń baqylaýynda bolyp, tolyǵymen maqsatqa saı jumsalýy tıis. Osy kúrdeli kezeńde qarjylandyrylyp jatqan jobalar arqyly eń aldymen jańa jumys oryndaryn ashý qajet. Buǵan jumysshylardy barynsha kóptep tartý kerek», - dedi Memleket basshysy.

QR Prezıdenti únemi ekonomıkalyq tabys ákeletin nemese adamı kapıtaldy damytatyn bastamalar qolǵa alynýy qajettigin atap ótti. Osyǵan qaraı, mektep, aýrýhana jáne basqa da nysandar salynyp, jańǵyrtý jumystary júrgizilýge tıistigin basa aıtty.

«Birkelki nysandardyń ár aımaqtaǵy quny óte alshaq bolýyna jol bermeý asa mańyzdy. Ókinishke qaraı, mundaı jaǵdaı bizde kóp kezdesedi. Júzege asqan jobalardyń áleýmettik-ekonomıkalyq tıimdiligine taldaý jasalady», - dedi Qasym-Jomart Toqaev.