QR Prezıdenti joǵary áskerı oqý oryndarynyń túlekterine ofıtserlik shen tabystady (FOTO)
ASTANA. QazAqparat - Qazaqstan sarbazdary biriligimizdiń berik qorǵany bolady dep kámil senemin. Bul týraly búgin Elbasy Nursultan Nazarbaev Astanada jyl saıynǵy dástúr boıynsha «Atameken» etno-memorıaldy keshen alańynda Memlekettik tý kóterý men ofıtserlik shen tapsyrýdyń saltanatty sharasynda málim etti.
«Bıyl biz Qazaq handyǵynyń qurylǵanyna 550 jyldyq merekesin atap óteıik dep otyrmyz. Baıraqty batyrlarymyz jáne erjúrek babalarymyz eldigimizdiń negizin qalaǵan, sondyqtan jas sarbazdarǵa osy kúni ofıtserlik shen tapsyrýdyń sımvoldyq máni óte zor. Ánuran áýenimen kóterilgen Kók baıraq ár qazaqstandyqtyń boıyna - jiger, júregine - nur quıady dep senemin. Rýhyn asyryp, mereıin tasytady. Sondaı asqaq sezimmen qýat alǵan erlerimiz biriligimizdiń berik qorǵany bolady dep kámil senemin»,- dedi Prezıdent.
Saltanatty shara aıasynda QR Prezıdenti, QR Qarýly Kúshteriniń Joǵarǵy Bas qolbasshysy Nursultan Nazarbaev elimizdiń joǵary áskerı oqý oryndarynyń túlekterine ofıtserlik pogon tabystady. ıAǵnı, QR Qorǵanys mınıstrligi Qurlyq áskeri ınstıtýtynyń, QR Ulttyq Ulany áskerı ınstıtýtynyń, QR Ulttyq qaýipsizdik komıteti Áskerı ınstıtýtynyń on eki túlegi Elbasynyń qolynan pogon aldy. Saltanatty shara barysynda patrıottyq kompozıtsııalar men áskerı marsh oryndaldy.
«Búginde Qazaqstanda joǵary áskerı oqý oryndaryn bitirip jatqan túlekter barshylyq. Solardyń barlyǵyn búgin sender arqyly quttyqtaımyn. Sizder óz ómirlerińizdi osy mamandyqqa burdyńyzdar. Sondyqtan bul qyzmet ońaı jumys emes. Otandy qorǵaý qasıeti árbir adamnyń boryshy!»,- dedi Elbasy.
