QR Prezıdenti janyndaǵy Jappaı qyryp-joıý qarýyn taratpaý jónindegi komıssııanyń alǵashqy otyrysy ótti
A. Qańtardyń 20-sy. QazAqparat /Qanat Mámetqazyuly/ - Búgin Aqordada QR Memlekettik hatshysy-Syrtqy ister mınıstri Qanat Saýdabaevtyń tóraǵalyǵymen QR Prezıdenti janyndaǵy Jappaı qyryp-joıý qarýyn taratpaý jónindegi komıssııanyń alǵashqy otyrysy bolyp ótti,
dep habarlaıdy QazAqparat.
«2010 jylǵy qańtardyń 11-inde Memleket basshysynyń Jarlyǵymen qurylǵan Jappaı qyryp-joıý qarýyn taratpaý jónindegi komıssııa qurylǵany belgili. Prezıdenttiń bul sheshimi memleketimiz júrgizip otyrǵan syrtqy saıasattyń qarýsyzdandyrý vektoryn nyǵaıtýdyń logıkalyq negizi bolyp tabylady. Demek, komıssııa múshelerine júkteler mindet pen paryz da salmaqty. Komıssııanyń elimizdiń halyqaralyq arenadaǵy jaýapkershiligi artyp EQYU-ǵa tóraǵalyq etýi bastalǵan kezinde qurylýynyń úlken saıası máni bar», dedi alǵashqy jıyndy ashyp sóz sóılegen Q. Saýdabaev. Sonymen birge, Memlekettik hatshy EQYU-ǵa tóraǵalyq etý barysynda Qazaqstan jappaı qyryp-joıý qarýyn taratpaý máselesine de negizgi basymdyq retinde qaraıtynyn aıta kele, bundaı komıssııa qurý arqyly elimizdiń atalmysh máseledegi kóshbasshylyǵy taǵy da naqtylana túskenin atap ótti.
QR Prezıdenti janyndaǵy bul Komıssııa halyqaralyq qarýsyzdaný rejımin nyǵaıtýǵa baǵyttalǵan bastamalar ázirleýdi qosa alǵanda elimizdiń atalmysh salaǵa qosymsha serpin berýin maqsat etpek. Bul jańa qurylym qyzmetine Qazaqstan moınyna alǵan halyqaralyq mindettemelerdi tıimdi atqarý jónindegi usynystardy ázirleý, ulttyq zańnamany odan ári jetildire túsý jáne ıadrolyq qaýipsizdik pen ıadrolyq nysandardyń fızıkalyq qorǵalý júıesin nyǵaıtý sharalary da kiredi.
Qazaqstan ıadrolyq qarýsyzdaný tájirıbelerine ıe bola otyryp, ıadrolyq qarýdan azat álem qurý ıdeıasyn qaltqysyz ustanatyn úlgi el retinde qyzmet etýge ázir ekendigi belgili. Naqty qadamdardyń biri retinde jaqynda BUU qabyldaǵan tamyzdyń 29-y - Halyqaralyq ıadrolyq áreketterge qarsylyq kúnin ataýǵa bolady.
