QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń otyrysy ótti

dep habarlaıdy QazAqparat.

Otyrysta halyqtyń kóshi-qony salasyndaǵy sybaılas jemqorlyqqa qarsy turýdaǵy memlekettik organdardyń, sondaı-aq sybaılas jemqorlyqqa qarsy memlekettik jáne óńirlik baǵdarlamalardy júzege asyrý boıynsha Soltústik Qazaqstan jáne Batys Qazaqstan oblystary ákimdikteriniń qabyldap jatqan sharalary talqylandy. Komıssııa otyrysyn ashqan Q. Saýdabaev táýelsizdik alǵan sátten bastap kóshi-qon úderisterin retteý máseleleri Qazaqstannyń memlekettik saıasatynyń mańyzdy jáne jaýapty baǵyttarynyń biri bolǵandyǵyn atap kórsetti. «Bizdiń respýblıkamyzdyń geografııalyq jaǵynan tıimdi ornalasýy, TMD elderimen shekarasynyń ashyqtyǵy, qolaıly ekonomıkalyq jaǵdaı, áleýmettik-saıası turaqtylyq, lıberaldy halyqaralyq kóshi-qon saıasaty Qazaqstandaǵy shetel azamattarynyń eńbek qyzmetiniń, sonyń ishinde zańsyz kóshi-qon aýqymynyń ósimine yqpal etetin negizgi faktorlar bolyp tabylady. Sheteldik jumys kúshin paıdalanýda tıisti tártiptiń joqtyǵynyń, zańnamalyq bazanyń jetildirilmegeniniń, negizgi kóshi-qon protsedýralary bıýrokrattyǵynyń nátıjesi halyqtyń kóshi-qony salasyndaǵy memlekettik organdardy baqylaıtyn qyzmetkerlerdiń arasynda jemqorlyqtyń ósýine yqpal etýde», dedi Q. Saýdabaev.

Otyrysta Eńbek jáne halyqty áleýmettik qorǵaý mınıstri Gúlshara Ábdihalyqova, Іshki ister mınıstri Serik Baımaǵambetov baıandama jasady. Sondaı-aq 2006-2010 jyldarǵa arnalǵan sybaılas jemqorlyqqa qarsy kúres jónindegi óńirlik baǵdarlamalardyń júzege asyrylýy týraly Soltústik Qazaqstan jáne Batys Qazaqstan oblystary ákimderiniń esepteri tyńdaldy. Otyrystyń qorytyndysy boıynsha komıssııa tıisti memlekettik organdarǵa kóshi-qon baqylaýy salasynda sybaılas jemqorlyqqa qarsy is-qımyl boıynsha, 2006-2010 jyldarǵa arnalǵan sybaılas jemqorlyqpen kúres jónindegi memlekettik jáne óńirlik baǵdarlamalardy iske asyrý josparlary, sondaı-aq Memleket basshysynyń sybaılas jemqorlyqqa qarsy kúresti kúsheıtý jónindegi tapsyrmalaryn oryndaý boıynsha túbegeıli sharalardy qabyldaý jóninde usynym jasady.