QR Prezıdenti janyndaǵy sybaılas jemqorlyqqa qarsy kúres máseleleri jónindegi komıssııanyń quramy jańardy

ASTANA. QazAqparat - Taıaý aralyqta Qazaqstanda sybaılas jemqorlyqqa qarsy kúrestiń jańa strategııasy qabyldanady. Bul týraly búgin QR Prezıdenti janyndaǵy sybaılas jemqorlyqqa qarsy kúres máseleleri jónindegi komıssııanyń otyrysynda QR Memlekettik hatshysy Gúlshara Ábdiqalyqova málim etti.

«Sybaılas jemqorlyqqa qarsy kúres máseleleri jónindegi komıssııanyń osy jylǵy qorytyndy otyrysyn bastaımyz. Ózderińizge málim, elimizde sybaılas jemqorlyqqa qarsy kúres memlekettik saıasattyń basty baǵyttarynyń biri retinde belgilenedi. Bul baǵytta naqty sharalar júzege asyrylyp jatyr. «Nur Otan» partııasynyń saıası keńesinde 2015-2025 jyldarǵa arnalǵan jańa baǵdarlama qabyldandy. Elbasynyń tapsyrmasy boıynsha taıaý merzimde sybaılas jemqorlyqqa qarsy kúrestiń jańa strategııasy qabyldanady»,-  dedi Memlekettik hatshy.

G.Ábdiqalyqova óz sózinde jemqorlyqqa qarsy kúrestiń yqpalyn arttyrý maqsatynda tamyz aıynda Memlekettik  qyzmet isteri jáne  sybaılas jemqorlyqqa qarsy is-qımyl  agenttigi qurylǵany eske salyp ótti.

«Sondaı-aq respýblıkalyq komıssııa jumysyn jandandyrýda birqatar is-shara qolǵa alynyp, jemqorlyqqa qarsy kúres boıynsha  belgilengen mehanızmder kezeń-kezeńimen júzege asyrylatyn bolady», - dedi ol.

Sonymen qatar Memlekettik hatshy óz sózinde QR Prezıdentiniń Jarlyǵymen «Nur Otan» partııasy janyndaǵy sybaılas jemqorlyqqa qarsy is-qımyl jónindegi respýblıkalyq qoǵamdyq keńestiń tóraǵasy, QR Parlamenti Májilisiniń depýtaty Q.Súleımenov, «Qazaqstannyń azamattyq alıansy» ZQT prezıdenti N.Erimbetov jáne «Transperensı Interneshnl Qazaqstan» qamqorshylyq keńesiniń tóraıymy N.Malıarchýk komıssııaǵa múshelikke engendigin jarııa etti.