QR Prezıdenti janyndaǵy Reformalar jónindegi joǵary keńes nemen aınalysady
Prezıdent bıylǵy 1 qyrkúıektegi Qazaqstan halqyna Joldaýynda ekonomıka, ónerkásip, qarjy, áleýmettik jáne basqa da salalarda túbegeıli reformalar júrgizý týraly mindetter qoıdy. Bul máselede Memleket basshysynyń bıylǵy 8 qyrkúıektegi Jarlyǵymen jańadan qurylǵan Strategııalyq josparlaý jáne reformalar agenttiginiń mańyzy zor.
Agenttik aǵymdaǵy jaǵdaıdy, qalyptasyp otyrǵan tendentsııalardy, álemdik tájirıbeni taldaý jáne osy negizde reformalardy iske asyrý tásilderin ázirleýdiń, sondaı-aq, olardyń oryndalý barysyna monıtorıng júrgizýdiń jaýapty memlekettik organy bolady.
Agenttikpen jáne ózge de memlekettik organdardyń bastamasymen reformalar jónindegi asa mańyzdy usynystardy qaraý jáne bekitý úshin Memleket basshysynyń 2020 jylǵy 14 qyrkúıektegi Jarlyǵymen Prezıdent janyndaǵy Reformalar jónindegi joǵary keńes quryldy.
Prezıdent janyndaǵy joǵary keńes jumysynyń tıimdiligin arttyrý maqsatynda keńes quramyna Eýropalyq qaıta qurý jáne damý bankiniń eks-prezıdenti (2012-2020 j.j.) Sýma Chakrabartı engizildi.
Sonymen qatar Memleket basshysynyń 14 qyrkúıektegi Ókimimen S. Chakrabartı Qazaqstan Respýblıkasy Prezıdentiniń ekonomıkalyq damý jónindegi shtattan tys keńesshisi bolyp taǵaıyndaldy.
S. Chakrabartı damýshy naryqtar máseleleri boıynsha maman, Ulybrıtanııa memlekettik qyzmeti júıesindegi iri reformalardy ázirleýde tájirıbesi mol. Ortalyq jáne Shyǵys Eýropa elderine tehnıkalyq kómek baǵdarlamasy – brıtandyq «noý-haý» qorynyń damýynda negizgi ról atqardy.
Eýropalyq qaıta qurý jáne damý bankiniń basshysy retinde S.Chakrabartı atalmysh qarjy ınstıtýtyn aýqymdy jańǵyrýdan ótkizdi. Ózi basshylyq etken jyldary bul mekeme Qazaqstanǵa 9 mlrd dollar kóleminde ınvestıtsııa saldy. EQQDB memlekettik-jeke menshik áriptestikti, «jasyl ekonomıka» men shaǵyn jáne orta bıznesti retteý men damytýdyń jańa tásilderin ázirleýde mańyzdy konsýltatıvtik kómek atqardy.
S. Chakrabartı Eýropalyq qaıta qurý jáne damý bankiniń basshysy bolǵan kezde Qazaqstan Respýblıkasy Prezıdenti janyndaǵy Shetel ınvestorlary keńesiniń teń tóraǵasy boldy.
