QR Prezıdenti janyndaǵy Memlekettik basqarý akademııasynda «Ashyq esik kúni» ótýde
ASTANA. Mamyrdyń 29-y. QazAqparat /Jasulan Amanbaıuly/ - Búgin QR Prezıdenti janyndaǵy Memlekettik basqarý akademııasynda «Ashyq esik kúni» sharasy ótýde,
dep habarlaıdy QazAqparat.
Jıynda sóz alǵan Akademııa rektory Aryn Orsarıevtiń aıtýynsha, bilim oshaǵy Qazaqstannyń básekege qabilettiligin arttyrý úshin memlekettik kadrlardy daıarlaýda jáne otandyq mamandardy damytýdyń qoldanbaly usynystaryn alǵa tartýda tabandylyq tanytýy qajet.
«QR Prezıdenti janyndaǵy Memlekettik basqarý akademııasy bilim sapasy jaǵynan Ortalyq Azııa, TMD elderiniń joǵary oqý oryndary arasynda 5-shi orynda tur. Bizdiń búgin uıymdastyrylǵan «Ashyq esik kúni» aktsııamyz akademııanyń negizgi múmkinshilikterimen tanystyrý jáne onyń basty artyqshylyqtaryn kórsetý», deıdi A. Orsarıev.
Oqý ordasyndaǵy stýdentterdiń 90 paıyzǵa jýyǵy bıýdjettik qarajat esebinen tálim alýda. Oqý úderisine jyl saıyn Garvard, London ekonomıka mektebi jáne Sıngapýr ulttyq ýnıversıteti sııaqty álemniń jetekshi JOO-nan bilikti professorlar tartylady. Bıylǵy aıaqtalǵan oqý jylynda 60-qa tarta sheteldik professor kelip, dáris oqydy. Akademııanyń 22 tyńdaýshysy Sıngapýr ýnıversıtetiniń dıplomyn aldy, 160 stýdent AQSh, Avstrııa, Gollandııa, Ulybrıtanııa, Frantsııa jáne Reseıde tájirıbe jınaqtap qaıtqan.
