QR Prezıdenti janyndaǵy adam quqyqtary jónindegi komıssııa mıtıngter týraly jańa zańdy ázirleýdi usyndy

ASTANA. QazAqparat - QR Prezıdenti janyndaǵy adam quqyqtary jónindegi komıssııa Úkimetke Qazaqstanda beıbit jıyndardy, mıtıngter men sherýlerdi uıymdastyrý men ótkizý tártibi týraly jańa zań jobasyn ázirlep qabyldaýdy usynýda. Bul týraly búgin atalǵan komıssııanyń hatshysy Tastemir Ábishev málim etti.

«Komıssııa Qazaqstanda beıbit jıyndardy, mıtıngter men sherýlerdi ótkizý týraly jańa zań jobasyn ázirleýdi nemese qoldanystaǵy zańnamaǵa eleýli ózgertýler men tolyqtyrýlar engizýdi usyndy», - dedi T. Ábishev «Qazaqstandaǵy adam quqyqtarynyń ahýaly týraly» baıandamany tanystyrý barysynda. Osy oraıda ol qoldanystaǵy zań 1995 jyldyń 17 naýryzynda qabyldanǵanyn eske salyp ótti. «Adam quqyqtary jónindegi komıssııanyń ustanymy boıynsha atalǵan zań jetildirýdi qajet etedi, sebebi, odan beri 20 jyl ýaqyt ótti», - dedi ol.