QR Prezıdenti VetMobile jobasyn iske asyra bastaýdy tapsyrdy
QR Aýyl sharýashylyǵy mınıstrliginiń bastamasymen jasalǵan qosymsha tórt túlik týraly veterınarlyq derekterdiń qalyptasý jáne derekterdi almasý protsesin tolyq tsıfrlyq formatqa kóshirip, mal dárigerleriniń jumysyn jeńildetpek.
Tehnologııalyq forým aıasynda uıymdastyrylǵan startap jobalar alleıasyn aralaý kezinde Qasym-Jomart Toqaev VetMobile jobasymen egjeı-tegjeıli tanysty.
Málim etilgendeı, qazir veterınarlar tórt túlik týraly málimetterdi qaǵaz túrindegi jýrnaldarǵa jazyp keledi. Al onda qatelikter de ketip jatyr. Keıin olar qate túrinde bazaǵa engiziledi.
Sol sebepti mal dárigerleri úshin VetMobile mobıldik qosymshasy jasalyp otyr. Onyń kómegimen maldyń qulaǵynda turǵan bırkany skanerleý arqyly sol janýar týraly barlyq málimetti bilýge bolady. Atap aıtqanda, qaı eldi mekende ósirilip otyrǵany, qandaı aýrýmen aýyrǵany, olarǵa qarsy qabyldanǵan emderi, profılaktıkalyq vaktsınalardyń bar-joǵy týraly derekter kórinedi.
Qazir veterınarlardy oqytý júrgizilip jatyr. Jobany qazan aıynyń basynan óńirlerdiń birinde pılottyq negizde iske qosý josparlanǵan. Oǵan 50 planshet qoldanylady.
Qazaqstan Prezıdenti mal dárigerleriniń qansha paıyzy bul jobamen qamtylatynyn surady.
Memleket basshysyna berilgen málimetke sáıkes, jyl sońyna deıin veterınarlardyń 60-70 paıyzy planshettermen qamtylatyny kútiledi. Ol úshin jergilikti organdarmen satyp alý máselesi pysyqtalady. Al ilki jobada qoldanylatyn planshetterdi Samsung kompanııasy qol qoıylǵan memorandým aıasynda tegin berip otyr.
Q.Toqaev VetMobile jobasynyń durys bastama ekendigin aıtyp, ony iske asyrýdy bastap, jalǵastyrýdy jáne qadaǵalaýda ustaýdy tapsyrdy.
Foto: t.me/bort_01
