QR Prezıdenti: Uzaq ómir súrý ındýstrııasy álemdik ekonomıkanyń mańyzdy bóligine aınaldy

ASTANA. QazAqparat - Búginde uzaq ómir súrý ındýstrııasy álemdik ekonomıkanyń mańyzdy bóligine aınalyp otyr. Bul týraly búgin Global Challenges Summit 2018 forýmynyń jalpy otyrysynda Qazaqstan Prezıdenti Nursultan Nazarbaev aıtty, dep habarlaıdy QazAqparat tilshisi.

«Ǵalamshar turǵyndary sany jyldam ósip keledi. Sońǵy onjyldyqtaǵy ǵylymı-tehnıkalyq progrestiń jetistikteri adam ómiriniń ortasha uzaqtyǵyn aıtarlyqtaı ulǵaıta tústi. Sońǵy 70 jylda ol 23 jylǵa, 48-den 71 jasqa deıin ósti. Qazaqstanda bul kórsetkish tek Táýelsizdik jyldarynyń ishinde ǵana 65-ten 72,5 jasqa deıin ulǵaıdy», - dedi Nursultan Nazarbaev.

Memleket basshysy uzaq ómir súrý ındýstrııasy búginde álemdik ekonomıkanyń mańyzdy bóligine aınalyp otyrǵandyǵyn basa aıtty.

«Degenmen, jyldam demografııalyq ózgerister bul máselege janama kóptegen sheshimderdi sheshýdi talap etedi. Ǵasyr ortasynda 10 mlrd turǵyndy tamaqpen qamtamasyz etý úshin búgingi kúnnen 60 paıyzǵa kóp azyq-túlik óndirýge týra keledi. Bazalyq resýrstardyń shekteýligin, ásirese tuşy sý tapshylyǵynyń arta túsýin eskerer bolsaq, bul ońaı mindet emes», - dedi Elbasy.

Qazaqstan Prezıdentiniń atap ótýinshe, aýyl sharýashylyǵy salasy eń joǵary tehnologııalyq salaǵa aınalýy qajet. Sondyqtan da elimiz zamanaýı tehnologııalardy paıdalaný arqyly agroónerkásip keshenindegi ósimdi 2 esege ulǵaıtý mindetin óz aldyna qoıyp otyr.

«Taǵy bir syn-tegeýrin turǵyndardyń qartaıýymen baılanysty zeınetaqy, áleýmettik qamsyzdandyrý júıelerin túbegeıli qaıta qurý qajettiginde. Olar demografııalyq shyndyqqa saı bolýy tıis», - dedi Nursultan Nazarbaev.