QR Prezıdenti: Ultty Abaısha súıýdi úırenýimiz kerek

NUR-SULTAN. QazAqparat – Biz eldi, ultty Abaısha súıýdi úırenýimiz kerek. Uly aqyn ultynyń kemshiligin qatty synasa da, tek bir ǵana oıdy – qazaǵyn, halqyn tórge jeteleýdi maqsat tutty.

Bul týraly Qasym-Jomart Toqaev óziniń «Abaı jáne HHІ ǵasyrdaǵy Qazaqstan» atty maqalasynda jazdy, dep habarlaıdy QazAqparat.

«Abaı qazaqtyń ár balasyn ultjandy azamat etip tárbıeleýge shaqyrdy. Onyń murasy – parasatty patrıotızmniń mektebi, eldikti qadirleýdiń negizi. Sondyqtan, azamattarymyzdyń kózi ashyq bolsyn desek, Abaıdy oqýdan, aqyn óleńin jattaýdan jalyqpaǵan jón»,-delingen Memleket basshysynyń maqalasynda.

Prezıdent maqalasynda sondaı-aq Abaıdyń mol murasy qazaq ultynyń jańa sapasyn qalyptastyrýǵa qyzmet etetindigin aıtady. Onyń shyǵarmalaryndaǵy oı-tujyrymdar árbir jastyń boıynda halqyna, eli men jerine degen patrıottyq sezimdi ornyqtyrady. Sondyqtan hakim Abaı eńbekteriniń nárin óskeleń urpaqtyń sanasyna sińirý jáne ómirlik azyǵyna aınaldyrý – ultty jańǵyrtýǵa jol ashatyn mańyzdy qadamnyń biri.

Aıta keteıik, Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy búgin «Egemen Qazaqstan» basylymynyń búgingi sanynda jarııalandy.