QR Prezıdenti: Úlkenge qurmet, kishige izet kórsetý –qanymyzǵa sińgen qasıet

ASTANA. QazAqparat – Elordada Respýblıka kúni qarsańynda «Mereıli otbasy» Ulttyq konkýrsynyń laýreattary marapattaldy, dep habarlaıdy QazAqparat QR Aqparat jáne qoǵamdyq damý mınıstrligine silteme jasap.

Ulttyq konkýrstyń jeńimpazdaryn saltanatty túrde marapattaý sharasy «Qazaqstan» ortalyq kontsert zalynda ótti.
Januıa qundylyqtarynyń rólin arttyryp, otbasy men nekeniń oń ımıdjin dáripteıtin aýqymdy da mańyzdy konkýrsqa 2014 jyldan beri 20 myńnan astam otbasy qatysty.
QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraǵasy Aıda Balaeva saltanatty sharanyń ashylýy barysynda baıqaý jeńimpazdaryna Memleket basshysynyń quttyqtaýyn oqyp berdi.

«Jyl saıyn ótkiziletin baıqaý shańyraǵy shattyqqa bólenip, berekeli birlik pen tatýlyqqa uıyǵan ónegeli otbasylardy kúlli elge tanytty. Mundaı úlgili áýletter elimizde óte kóp.
Halqymyz qaı zamanda da otbasy dástúrlerin berik ustanyp, qadirleı bilgen. Úlkenge qurmet, kishige izet kórsetý –bizdiń qanymyzǵa sińgen qasıet.
Árbir azamattyń adamgershilik bolmysynyń qalypatsýyna otbasyndaǵy ahýal aıryqsha yqpal etedi. Áke-sheshesiniń ata-ájeniń tárbıesin kórip, úlkenderden taǵlym alyp ósken bala eseıgende otanshyl, bilimpaz, eńbekqor azamatqa aınalady» - delingen Prezıdent quttyqtaýynda.

Bıyl baıqaýǵa 2542 otbasy qatysty. Olardyń jartysynan astamy (63,4%) – aýyl turǵyndary. Sondaı-aq 1166-sy kópbalaly, 501-i jas otbasy (erli-zaıyptynyń ekeýi de 29 jasqa tolmaǵan) qatysty.
Túrli kásip pen eńbek áýletteriniń, sport jáne shyǵarmashylyq januıa ókilderinen quralǵan 20 otbasy – óńir jeńimpazdary atandy.

Barlyq otbasynyń árbir múshesi – aýyldastarynyń, qala turǵyndarynyń, áriptesteriniń, kórshi-qolańnyń qurmetine bólengen, Otanyna adal qyzmet etip júrgen eńbek adamy, aýyldyń, qalanyń qarapaıym eńbekkerleri.
Laýreat otbasylar dıplomdarmen jáne estelik syılyqtarmen marapattaldy.

Foto: gov.kz