QR Prezıdenti: Turmystyq jemqorlyqpen kúres jónindegi jol kartasyn ázirleý kerek
Bul týraly sybaılas jemqorlyqqa qarsy kúres máseleleri jónindegi keńeste sóz sóılegen QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Kúndelikti ómirde jemqorlyq jaǵdaılaryna tap bolǵan jurt sharasyz kúıge túsedi, ádildiktiń bar ekenine senbeıdi. Pandemııamen jalpy ulttyq deńgeıde jappaı kúres júrip jatqanda paıda tabý úshin adam qanshalyqty arsyz bolýy kerek? Mysaly, Almatydaǵy Jetisý aýdany ákimdiginiń qyzmetkerleri azamattardy blokpostan ótkizý úshin únemi para alyp otyrǵan. Mundaı derekter birneshe óńirde baıqaldy. Tipti, barlyq jerde osylaı bolǵan shyǵar dep oılaımyn. Azamattarymyz turmystyq sybaılas jemqorlyqpen betpe-bet kelip otyrǵan kezde siz ben bizdiń istep jatqan jumysymyzdyń esh tıimdiligi bolmaıdy. Eshqandaı halyqaralyq reıtıngtiń de keregi bolmaı qalatyny túsinikti», - dep atap ótti QR Prezıdenti.
Memleket basshysy túrli tartý-taralǵy berý, syılyq talap etý, dıplom satyp alý – kelmeske ketýi kerektigin basa aıtty.
«Bul úshin qoǵamda jemqorlyqtan jappaı jırenýge qol jetkizýimiz qajet. Sybaılas jemqorlyqqa qarsy is-qımyl agenttigi Úkimetpen birlesip, Turmystyq jemqorlyqpen kúres jónindegi jol kartasyn ázirleýi kerek», - dedi Qasym-Jomart Toqaev.