QR Prezıdenti: Túrli salalarda jetistikke jetken jastardyń eńbegin nasıhattaýymyz kerek

NUR-SULTAN. QazAparat - Biz túrli salada jetistikke jetken osyndaı otandastarymyzdyń eńbegin dáripteýimiz kerek. Búgin «Qazaqstannyń 100 jańa esim» jobasynyń jeńimpazdarymen kezdesýinde sóılegen sózinde QR Prezıdenti Qasym-Jomart Toqaev osylaı dedi.

«Qadirli dostar! Eń aldymen barshańyzdy búgingi jarqyn jeńisterińizben shyn júrekten quttyqtaımyn! Bıyl «Júz jańa esim» jalpyulttyq jobasy qasterli Táýelsizdigimizdiń 30 jyldyǵy aıasynda ótkizilip otyr. Elbasynyń bastamasymen qolǵa alynǵan aýqymdy shara arqyly kóptegen qazaqstandyq búkil elge tanyldy. Jalpy, ár ulttyń qaımaǵy sanalatyn tańdaýly azamattary bolady. Eldi alǵa bastaıtyn da, álemge tanytatyn da – osyndaı erekshe jandar. Halqymyzda «Júzden – júırik, myńnan – tulpar» degen qanatty sóz bar. Sizder óz daryndaryńyzben kópshilikti moıyndata bildińizder. Memleketimizdi órkendetýge aıryqsha úles qosyp kelesizder. Qazaqstandy basqa elder ózderińiz arqyly baǵalaıdy. Sizderdi bizdiń memleketimizdiń maqtanyshy dep aıtsaq artyq bolmaıdy»,-dedi Memleket basshysy.

Sondaı-aq ol sózinde búginde álemdik deńgeıdegi alpaýyt kompanııalarda abyroıly eńbek etip jatqan jerlesterimiz kóp ekendigin atap ótti. Qazaqtyń qandaı halyq ekenin jer júzine tanytyp júrgen birneshe azamat osy jobanyń jeńimpazy atandy.

«Biz túrli salada jetistikke jetken osyndaı otandastarymyzdyń eńbegin dáripteýimiz kerek. Óıtkeni, tabysty jandardyń tájirıbesi árdaıym basqalarǵa úlgi-ónege. Óskeleń urpaq ózderińizge qarap boı túzeıdi, uqsaýǵa tyrysady. Men elimizdiń árbir perzenti sizder sııaqty ónegeli bolsyn dep tileımin. Qazaq «Jaqsynyń jaqsylyǵyn aıt nury tasysyn» dep, dara tulǵalarynyń mereıin asyrǵan. Búgingi beles sizderdi jańa bıikterge bastaıdy dep senemin»,-dedi Prezıdent.

Memleket basshysy búgin Qazaqstannyń «100 jańa esim» jobasynyń qatysýshylarymen kezdesti.