QR Prezıdenti Teleradıokesheniniń alleıasy ashyldy
NUR-SULTAN. QazAqparat - Búgin QR Prezıdenti Teleradıokesheniniń qyzmetkerleri Nur-Sultan qalasyndaǵy Shabal Beısekova atyndaǵy kóshe boıyndaǵy jańa alleıaǵa tal kóshetterin otyrǵyzdy, dep habarlaıdy QazAqparat.
Іs-shara QR Táýelsizdiginiń 30 jyldyǵyna oraı uıymdastyryldy.
«70-ten astam aǵash egildi, úıeńki, qaraǵash, qaraǵaı, balqaraǵaı, terek kóshetteri qalamyzdyń ekologııalyq aımaqtaryn keńeıtýge arnalǵan alleıalar sanyn kóbeıtedi. Elimizdi keń aýqymdy kógaldandyrý qajet ekeni jaıly Prezıdent Qasym-Jomart Toqaevtyń Joldaýynda aıtylǵan, «5 jyl ishinde orman alqabynda 2 mıllıardtan astam jáne eldi mekenderde 15 mıllıon tal otyrǵyzylady»,– dedi Memleket basshysy.
QR Prezıdenti Teleradıokesheni qyzmetkerleri jańa alleıaǵa kóshet otyrǵyzý bastamasyn tabıǵı resýrstardy kóbeıtý, qorshaǵan ortaǵa uqypty qaraý isine jeke úles qosýǵa degen umtylyspen baılanystyrady.
Negizinde aǵash ósirýge kóp jyl ýaqyt kerek, sondyqtan árqaısymyz jasyl jelekterdi saqtaý úshin qoldan kelgenniń bárin jasaýymyz qajet. Taldardy kútip-baptaýdyń ári qorǵaýdyń erejeleri kúsheıtilgeni de kezdeısoq emes. Eger buryn aǵashtardy kesý kezinde onyń ótemi «bir aǵashqa bes aǵashtan» keletin bolsa, qazir «bir aǵashqa on aǵash» dep bekitilgen.
Táýelsizdiktiń 30 jyldyǵy qarsańynda QR Prezıdenti Teleradıokesheniniń qurylǵanyna 25 jyl tolǵaly otyr. Teleradıokesheniniń basshysy Raýshan Qajybaevanyń aıtýynsha, Qazaqstannyń aqparattyq alańynda TRK qoǵamdyq-saıası dokýmentalıstıkasynyń ózindik orny bar.
Shırek ǵasyr ishinde Qazaqstan memlekettiliginiń qalyptasýy men damý tarıhy týraly baıandaıtyn 800-den astam derekti fılm túsirildi. Búginde mereıtoı aıasynda «Qýatty óńirler – Qýatty Qazaqstan» arnaıy jobasy jáne «Men jáne meniń elim» taqyryptyq rolıkter toptamasy júzege asyrylýda.
Sondaı-aq, Raýshan Qajybaeva QR Prezıdentiniń Teleradıokesheni qyzmetkerleriniń jańa alleıaǵa tal otyrǵyzýy El Táýelsizdiginiń 30 jyldyǵyn merekeleýge daıyndyq sharalaryna úles qosatynyn atap ótti.
