QR Prezıdenti Tájikstannyń Madjlısı namoıandagon Madjlısı Olı tóraǵasymen kezdesti

NUR-SULTAN. QazAqparat - QR Prezıdenti Tájikstannyń Madjlısı namoıandagon Madjlısı Olı tóraǵasy Mahmadtoır Zokırzodamen kezdesti. Kezdesý barysynda Qasym-Jomart Toqaev pen Mahmadtoır Zokırzoda Qazaqstan men Tájikstan arasyndaǵy parlamentaralyq yntymaqtastyqtyń perspektıvalaryn talqylady, dep habarlaıdy Aqordanyń resmı saıty.

Qasym-Jomart Toqaev Mahmadtoır Zokırzodaǵa Tájikstan Prezıdentimen kelissózderdiń tabysty ári jemisti ótkenin aıtty. Memleket basshysynyń aıtýynsha, Tájikstanmen jan-jaqty yntymaqtastyqty damytý, onyń ishinde, zań shyǵarý salasy boıynsha birlesip jumys isteý Qazaqstannyń syrtqy saıasattaǵy basym baǵyttarynyń biri.

Qasym-Jomart Toqaev Mahmadtoır Zokırzodaǵa óziniń Parlament Senatynyń tóraǵasy qyzmetin atqarǵan kezindegi jumysy týraly aıtyp, zań shyǵarý qyzmeti men parlamenttik dıplomatııa ınstıtýtynyń mańyzdy ekenine toqtaldy.

Óz kezeginde Tájikstan Parlamenti tómengi palatasynyń tóraǵasy Memleket basshysyna kezdesýge múmkindik jasaǵany úshin alǵys aıtty. Sondaı-aq ekijaqty parlamentaralyq baılanystardyń tıimdiligi men damý deńgeıiniń joǵary ekenin jetkizdi.