QR Prezıdenti: Taýly Qarabaqtaǵy qaqtyǵysty toqtatý týraly kelisim – tarıhı sheshim

NUR-SULTAN. QazAqparat – Memleket basshysy Qasym-Jomart Toqaev Reseı Federatsııasynyń tóraǵalyǵymen vıdeokonferentsııa formatynda ótip jatqan Ujymdyq qaýipsizdik týraly shart uıymy Ujymdyq qaýipsizdik keńesiniń sessııasyna qatysýda, dep habarlaıdy QazAqparat tilshisi.

«Bizdiń bul kezdesýimiz aımaqtaǵy jáne jalpy álemdegi kúrdeli protsester aıasynda ótip jatyr. Aımaqtyq jáne jahandyq qaýipsizdik salasyndaǵy jaǵdaılar memleketaralyq qarym-qatynasta qaqtyǵys áleýetiniń artýymen tipti ýshyǵyp barady. Osynyń aıasynda Taýly Qarabaqtaǵy áskerı qaqtyǵystardy toqtatý maqsatynda jasaǵan Reseı prezıdenti Vladımır Vladımırovıch Pýtınniń bastamasyna eń joǵary baǵa berýge bolady», - dedi Qasym-Jomart Toqaev sessııada.

Qazaqstan Prezıdentiniń aıtýynsha, Reseıdiń qatysýymen jasalǵan kelisimdi týyndaǵan qıyn jaǵdaıdaǵy eń durys sheshim dep atady.

«Bul kelisim aımaqtaǵy uzaq merzimdi beıbitshilikti qamtamasyz etedi. Meniń oıymsha, bul – tarıhı sheshim», - dedi ol.