QR Prezıdenti: Sodyrlar basqa aýmaqtarda oshaqtaryn jandandyrýy múmkin ekenin túsingen abzal

ASTANA. QazAqparat - Elordada ótip jatqan Astana klýbynyń úshinshi otyrysynda Qazaqstan Prezıdenti Nursultan Nazarbaev álem úshinshi dúnıejúzilik soǵys jaǵdaıynda turǵandaı ispetti ekenin málim etti, dep habarlaıdy QazAqparat.

«Halyqaralyq terrorızm apatty aýqymqa jetip otyr. Ol úshin shekara joq. Búginde jer sharynyń kez kelgen núktesi búldirgi kúshtiń nysany bolýy yqtımal. Úshinshi myńjyldyq bastalǵaly qaza bolǵandardyń sany sekildi teraktilerdiń kólemi on ese artty. 2016 jyly teraktiler 104 elde boldy. Bul óz kezeginde álemniń jartysy dep aıtýǵa bolady. Geografııasy men aýqymy boıynsha biz shartty túrde úshinshi dúnıejúzilik soǵys jaǵdaıynda turǵandaımyz, ıaǵnı terrorǵa qarsy soǵysqa qatysty», - dedi Elbasy.  

Osy oraıda Prezıdent teraktiler damýshy elderden damyǵan elderge qaraı aýyp bara jatqanyn atap ótti. Lańkestiktiń jahandyq ındeksi málimetine qaraǵanda, terrorızm turǵysynda 2015 jyl Ekonomıkalyq yntymaqtastyq jáne damý uıymy elderi úshin eń  qıyn jyl boldy. Shabýyldar sany 731-ge jetip, teraktiler EYDU-nyń quramyndaǵy 34 eldiń arasynda 21-inde oryn alǵan.

«Qaıshylyqtarǵa qaramastan, álemdik óńirlik derjavalar Taıaý Shyǵysta DAISh-pen kúreste is-qımyldy úılestirýge qaýqarly boldy. Alaıda talqandalǵan sodyrlar basqa aýmaqtarda oshaqtaryn jandandyrýy múmkin ekenin túsingen abzal. Bul óz kezeginde barsha Eýrazııa úshin kúrdeli syn-qater», - dep túıindedi sózin Nursultan Nazarbaev.

 Aıta keteıik, Astanada Qazaqstan Prezıdenti Nursultan Nazarbaevtyń qatysýymen Astana klýbynyń úshinshi otyrysy ótip jatyr. «Forýmnyń jumysyna Túrkııanyń eks-prezdenti Abdolla Gúl, Chehııanyń eks-prezıdenti Vatslav Klaýs, Slovenııanyń eks-prezıdenti Danılo Tıýrk, sondaı-aq kórnekti qoǵam jáne memleket qaıratkerleri, álemniń jetekshi sarapshylary, belgili saıasatkerler men dıplomattar qatysýda.