QR Prezıdenti «SITIK Grýpp» korporatsııasynyń dırektorlar keńesi tóraǵasymen birlesken ınvestıtsııalyq jobalardy júzege asyrý máselesin talqylady
BEIJІŃ-ASTANA. QazAqparat - Qazaqstan Prezıdenti Nursultan Nazarbaev «SITIK Grýpp» korporatsııasynyń dırektorlar keńesiniń tóraǵasy Chan Chjenmınmen kezdesti.
Bul týraly Aqordanyń baspasóz qyzmeti habarlaıdy.
Kezdesý barysynda birlesken ınvestıtsııalyq jobalardy júzege asyrý, sondaı-aq Qazaqstannyń «Nurly jol» baǵdarlamasy aıasyndaǵy ınfraqurylymdyq damýyna kompanııanyń qatysýy máseleleri talqylandy.
Memleket basshysy "SITIK Grýpp" korporatsııasy men Qazaqstannyń jaqsy yntymaqtastyq tarıhy bar ekenin atap ótti. - Biz birlesip jumys istegen jyldary mol tájirıbe jınadyq. Kompanııa Qazaqstannyń naryǵyndaǵy qyzmeti kezinde oń nátıjelerge jetti. Qazir jańa zaman kele jatyr, jańa jobalar men mindetter týyndaýda, - dedi Nursultan Nazarbaev.
Chan Chjenmın kompanııaǵa kóp jyldar qoldaý kórsetkeni jáne elde sheteldik ınvestorlarǵa qolaıly jaǵdaı jasaǵany úshin Memleket basshysyna alǵys aıtty.
