QR Prezıdenti ShYU-nyń shuǵyl sheshilýi tıis ekologııalyq problemalary tizimin qurýdy usyndy
Bul týraly Shanhaı Yntymaqtastyq Uıymyna múshe memleketter basshylary keńesiniń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Biz ekologııalyq problemalardy, olardyń elimizdiń áleýmettik-ekonomıkalyq damýyna teris saldaryn basty nazarda ustaýǵa mindettimiz. Sondyqtan da ShYU-ǵa múshe memleketterdiń tıisti vedomstvolary úshin osynaý problema boıynsha ózara is-qımyldy kúsheıtý barynsha mańyzdy. ShYU-nyń shuǵyl ujymdyq sheshimdi talap etetin ekologııalyq problemalary tizimin qurý bul saladaǵy istiń jaı-kúıine qatysty jaıtty qalyptastyrýǵa múmkindik berer edi», - dedi Qazaqstan Prezıdenti.
Memleket basshysy osy jyl Ekinshi dúnıejúzilik soǵystyń aıaqtalýynyń jáne BUU qurylýynyń 75 jyldyǵy aıasynda ótip jatqanyn eske saldy.
«Kelesi jyly ShYU-nyń 20 jyldyǵyn atap ótemiz. Osynaý tarıhı meje óńirlik jáne jahandyq problemalardy sheshýdiń kelisimdi ádisteriniń túbegeıli mańyzdy ekendigin eske túsiredi. Halyqaralyq seriktestik aıasyn keńeıtýge arnalǵan syrtqy ashyqtyq pen naqtylyq túptep kelgende uıymymyzdyń tıimdiliginiń kepili sanalady. ShYU-nyń ózge de halyqaralyq, onyń ishinde BUU júıesine kiretin uıymdarmen yntymaqtastyq týraly memorandýǵa qol qoıý týraly sheshimin qoldaımyz. ShYU mereıtoıy - bul onyń súbeli jetistigin tek qana atap ótý úshin emes, sonymen birge paıdaly sabaq alý úshin kemshin tustardy anyqtaý úshin de jaqsy múmkindik», - dep atap ótti Qasym-Jomart Toqaev.
Osy rette QR Prezıdenti uıym hatshylyǵyna ShYU-nyń tetikteri men organdary qyzmetin jetildirý boıynsha naqty usynystar engize otyryp, onyń qyzmetine jan-jaqty saraptama ázirleýdi tapsyrý usynysyn jasady.
