QR Prezıdenti saılaýyna túsýge tipti, kóripkel de, jumyssyz da nıet bildiredi - M.Joldasbekov
ASTANA. QazAqparat - QR Prezıdenti saılaýyna tipti, kóripkel de, jumyssyz da nıet bildiredi. Bul týraly búgin QR Prezıdenttigine kandıdattardy memlekettik tildi erkin meńgergendigin anyqtaý jónindegi lıngvıstıkalyq komıssııanyń tóraǵasy Myrzataı Joldasbekov málim etti.
2011 jyly ótken kezekten tys saılaý barysynda oryn alǵan jaıttar jaıynda BAQ ókilderimen bólisken komıssııa tóraǵasy M.Joldasbekov: «Kóptegen adamdar aınaldyrǵan eki bet jazba jumysynda 16 qateden bastap, 32, 36, 46, 52 qatege deıin jiberdi. Bul bir, ekinshiden, kelgen kisilerdiń kópshiligi jumyssyz júrgen adamdar boldy. Birneshe ekstrasenster keldi. Máselen, bir kisi: «Poıyzben Almatydan Pavlodarǵa ketip bara jatyr edim, Astanaǵa kelgende prezıdenttik saılaý esime túsip, sizderdiń aldaryńyzǵa kelip otyrmyn», deıdi. Al bir áıel tańerteń shaı iship otyrǵanda esine saılaýdyń jarııalanǵany sap ete túsip, sodan bizdiń aldymyzǵa ózin kandıdat retinde usyný úshin kelipti. Mine, osyndaı jaıttar oryn alǵan bolatyn», - dedi.
Onyń aıtýynsha, aǵymdaǵy jyly prezıdenttik kandıdattar 1 mln. 60 myń teńge jarna tóleý kerek bolsa, 2011 jyly onyń kólemi 800 myń teńge quraǵan. Al sol jyly kandıdat retinde tirkelýge kelgen bir azamat aqshasynyń joq ekendigin aıtyp, onyń ornyna sekseýil usynsa, endi biri komıssııa múshelerinen qarjylaı qoldaý suraǵan.
«Aldymyzdan talaı azamat ótti, bári Qazaqstan azamattary, báriniń de quqyǵy birdeı. Biraq Prezıdent bolatyn adam halyqtyń taǵdyryn oılaýy kerek qoı. Prezıdent bolatyn adam eń bolmaǵanda bir mekemeni basqarýy kerek qoı. Jumyssyz júrgen, jumysqa eshkim almaǵan azamat erteń onyń betin arman qylsyn, qudaı saqtasyn, Prezıdent bolatyn bolsa, memlekettiń taǵdyry ne bolmaq?», - dedi ol.
