QR Prezıdenti saılaýyna halyqaralyq qoǵamdastyqtyń zor qyzyǵýshylyq tanytýy Qazaqstannyń halyqaralyq saıasattaǵy mańyzdy rólin kórsetedi - A.Sımıonov
ASTANA. QazAqparat - QR Prezıdenti saılaýyna halyqaralyq qoǵamdastyqtyń qyzyǵýshylyǵy Qazaqstannyń halyqaralyq saıasattaǵy mańyzdy rólin kórsetedi.
Bul pikirdi búgin QR Ortalyq saılaý komıssııasynda ótken brıfıngte Moldova Respýblıkasy Ortalyq saılaý komıssııasynyń múshesi Aleksandr Sımıonov bildirdi.
«Búgingi kezdesý barysyndaǵy bizdiń pikir almasýymyz Qazaqstan Respýblıkasy Ortalyq saılaý komıssııasynyń saılaý kúnine tyńǵylyqty daıyndalǵanyn kórsetedi», - dedi ol brıfıng barysynda.
Sonymen qatar ol aldaǵy saılaý Qazaqstannyń Ortalyq saılaý komıssııasy jáne saılaý organdarynyń barlyq qyzmetkerleri úshin synaq ekendigin basa atap ótti.
«Biz bul synaqtyń úzdik tapsyrylatyndyǵyna senimimiz mol. Sonymen birge bul saılaýǵa halyqaralyq qoǵamdastyq tarabynan zor qyzyǵýshylyq bar ekendigin aıryqsha atap ótkim keledi. Al bul Qazaqstan Respýblıkasynyń halyqaralyq saıasatta óte mańyzdy oryn alatyndyǵyn dáleldeı túsedi», - dedi A.Sımıonov.
