QR Prezıdenti saılaýy: A.Syrǵabaev ana tilin turmystyq deńgeıde bilgeni úshin uıalatyndyǵyn ashyq aıtty
«Synaq óz talaptaryna saı ótti, renjirlik esh jaıt oryn almady. Bári oryndy. Shynymdy aıtsam, men alǵash ret qazaqsha jazdym. Sebebi osy ýaqytqa deıin ondaı talap maǵan qoıylmaǵan edi. Shala qazaqtyqqa salynyp, turmystyq deńgeıde ǵana tildi bilip júrgen azamatpyz ǵoı. Tipti, biz keńes zamanynda bilim aldyq. Al búgingi kórsetken nátıjeme ádil baǵa qoıyldy», - dedi A.Syrǵabaev QR Prezıdenttigine kandıdattardy memlekettik tildi erkin meńgergendigin anyqtaý jónindegi lıngvıstıkalyq komıssııa synaǵynan keıin BAQ ókilderine.
Sonymen qatar ol búgingi komıssııa synaǵynan óte almaýy uıatty jaǵdaı ekendigin de ashyq moıyndady.
Aıta keteıik, ol komıssııa synaǵynyń alǵashqy kezeńinde eki bet jazba jumysynda 92 qate jiberip, ekinshi kezeńde úsh bettik mátindi ejiktep oqyǵan. Al sońǵy kezeńde de «El birligi - el arqaýy» degen taqyrypta oıyn tolyq jetkize almaǵan edi.
