QR Prezıdenti: Saltanatty sherý - Uly Jeńiske jáne Otan qorǵaýshy kúnine kórsetilgen qurmet
- Іs-shara barysynda Memleket basshysy - Qarýly Kúshterdiń Joǵarǵy Bas Qolbasshysy parad avtokóligimen áskerı qyzmetshiler sapyn aralap, paradtyq eseptoptarǵa amandasty.
Nursultan Nazarbaev barsha qazaqstandyqtardy jáne áskerı sherýge qatysýshylardy Otan qorǵaýshy kúnimen, aldaǵy Uly Jeńistiń 70 jyldyǵymen quttyqtady.
- Eki merekeniń qatar kelýiniń sımvoldyq máni bar. Bul Uly Otan soǵysyndaǵy jeńimpazdar men Otan qorǵaýshylarymyzdyń búgingi býynynyń áskerı dástúrleriniń sabaqtastyǵyn bildiredi. Maıdandaǵy áskerı erlik pen tyldaǵy qajyrly eńbek Jeńistiń basty negizine aınaldy. Bizdiń halqymyz adamzat tarıhyndaǵy eń surapyl soǵystaǵy Uly Jeńiske óshpes úles qosty. Soǵysqa attanǵan 1 mıllıon 200 myń jerlesimizdiń jartysy shaıqas alańynda qaza tapty. 500-den astam qazaqstandyq Keńes Odaǵynyń Batyry atandy. Soǵys jyldary búkil halqymyz tyldaǵy eńbekke jumyldy. Jaýǵa atylǵan 10 oqtyń toǵyzy bizdiń elimizde jasaldy. Ákelerimizdiń erligi men analarymyzdyń eńbegi halqymyzdyń jadynda máńgi saqtalady. Bizdiń jeńisterimizdiń tarıhy - patrıotızm men el birliginiń naǵyz úlgisi, - dedi Qazaqstan Prezıdenti.
Memleket basshysy soǵys jáne eńbek ardagerlerin Uly Jeńis mereıtoıymen quttyqtap, olardyń jaýyngerlik jáne eńbektegi erligi halqymyzdyń barlyq býyny úshin máńgilik ekenin, al erlik árdaıym qasıetti bolyp qala beretinin atap ótti.
Sonymen qatar, Qazaqstan Prezıdenti bes halyqtyq reformany júzege asyrý jańa urpaq úshin bolashaqtaǵy kóp jyldarǵa ilgeri jol ashatynyn aıtty.
- Bizdiń barlyq jetistikterimiz - jańa bıikterge bastaıtyn yntalandyrý. Bıyl 20 jyldyǵyn atap ótip jatqan Konstıtýtsııanyń birinshi sózi: «Biz, Qazaqstan halqy» dep bastalady. Bul - kópultty halyq birliginiń myzǵymas formýlasy. Biz eń basty qundylyqtarymyzdy - táýelsizdikti, tatýlyq pen turaqtylyqty ǵasyrdan-ǵasyrlarǵa saqtaýǵa tıispiz. Barlyq memlekettik ınstıtýttardyń jáne árbir qazaqstandyqtyń paryzy - osy qundylyqtardy qorǵaý. Otan qorǵaýshylardyń aldyńǵy qatarynda bizdiń aıbarly Qarýly kúshterimiz tur, - dedi Nursultan Nazarbaev.
Memleket basshysy Joǵarǵy Bas Qolbasshy retinde elimizdiń áskerı qyzmetshilerine sóz arnady.
- Sizderge bıik mindet - Qazaqstan egemendigi men azamattardyń tynyshtyǵyn qorǵaý júktelgen. Osy qasıetti paryzdy adal oryndańyzdar. Búgin bizdiń aıbyndy jaýyngerlerimiz osy alańnan saltanatty sherý tartyp ótedi. Bul - Uly Jeńiske jáne Otan qorǵaýshy kúnine kórsetilgen qurmet, - dedi Qazaqstan Prezıdenti.
Sońynda Nursultan Nazarbaev qazaqstandyqtardy taǵy da merekemen quttyqtap, elimizge tatýlyq pen tynyshtyq tiledi.
***
Bul parad ótken jyldardaǵy paradtarǵa qaraǵanda kórneki, qatysýshylar sany jaǵynan eń aýqymdysy boldy. Oǵan elimiz Qarýly Kúshteriniń áskerı qyzmetshileri men áskerı tehnıka sanynyń rekordtyq mólsheri tartylǵan. Atap aıtqanda, paradqa 5 000-ǵa jýyq áskerı qyzmetshi, 200 birlik shamasynda qarý-jaraq pen áskerı tehnıka, áskerı avıatsııanyń 70 ushaǵy men tikushaǵy qatysty. Qazirgi zamanǵy QR Qarýly Kúshterimen qatar Uly Otan soǵysy ýaqytyndaǵy armııa men qarý-jaraq túrleri kórsetildi.
Osy oraıda tý ustaýshy toptardyń QR Memlekettik týy men osydan 70 jyl buryn otandasymyz Raqymjan Qoshqarbaev jáne onyń jaýynger dosy Grıgorıı Býlatovtyń Reıhstagqa tikken týynyń dál kóshirmesi - Jeńistiń qyzyl týyn alańǵa alyp shyǵý erekshe rásim túrinde usynyldy. Jaýyngerlik tý Qazaqstanǵa Máskeýdegi Taǵzym taýynan ákelindi.
Parad barysynda jaıaý áskerler men áskerı tehnıka sherýi ótti. Avıa-shoý erekshe mańyzǵa ıe boldy. Áskerı ushqyshtar jeke jáne pılotajdy top quramynda joǵarǵy pılotaj fıgýralaryn oryndap, óz sheberlikterin kórsetti, sondaı-aq áýede Uly Jeńistiń mereıtoıyn bildiretin «70» sanyn jazdy.
