QR Prezıdenti reseılik qandastardy memlekettik nagradamen marapattady

ASTANA. QazAqparat – Reseılik birqatar qandasymyz memlekettik marapatqa ıe boldy. Bul týraly «Otandastar qory» kommertsııalyq emes aktsıonerlik qoǵamynan málim etti, dep habarlaıldy QazAqparat.

QR Prezıdenti Qasym-Jomart Toqaevtyń sheshimimen memlekettik jáne qoǵamdyq qyzmette sińirgen eńbegi men halyqtar arasyndaǵy dostyqty nyǵaıtýǵa qosqan eleýli úlesi úshin «Shapaǵat» medalimen marapattaldy:

- Reseı Federatsııasy Krasnoıarsk qalasynyń «Aq Jaıyq» jergilikti qazaq ulttyq-mádenı avtonomııasy qoǵamdyq uıymy tóraǵasynyń orynbasary Gúlnar Ǵarıfqyzy;

- «Omby qazaqtary» qoǵamdyq uıymynyń negizin qalaýshy, «Omby qazaqtary» óńirlik mádenı-aǵartý gazetiniń bas redaktory, Reseı Jýrnalıster odaǵynyń múshesi Torǵyn Muhamedııarqyzy marapattaldy.

30 jeltoqsanda Qazaqstannyń Máskeýde ornalasqan elshilik ǵımaratynda marapatty elimizdiń Reseıdegi Elshisi Ermek Kósherbaev tabystady.

Qor málimetine súıensek,Gúlnar Garıfqyzy 2012 jyldan bastap Krasnoıarsk ólkesiniń aýmaǵynda qazaq mádenıetin saqtaýǵa jáne nasıhattaýǵa baǵa jetpes úles qosyp keledi.

Torǵyn Muhamedııarqyzy 2008 jyly «Omby qazaqtary» qoǵamdyq uıymyn qurdy. Ulttyq qundylyqtarymyzdy saqtap, dáripteýge, ásirese jastar arasynda dástúrli qundylyqtardy, til men mádenıetti damytýǵa kóptegen mańyzdy jobalardy júzege asyrýda. Uıymnyń eń tanymal jobalary: jalpyqalalyq Naýryz, «Arý qyz» - talant jáne sulýlyq baıqaýy, «Dostyq lıgasy» jastar búkilreseılik ultaralyq forýmy, qazaq jastarynyń «Alǵa»forýmy jáne taǵy basqa.