QR Prezıdenti Reseı men Tatarstandy AHQO jumysyna qatysýǵa shaqyrdy

QAZAN. QazAqparat - Qazan federaldyq ýnıversıtetinde sóılegen sózinde Qazaqstan Respýblıkasynyń Prezıdenti Nursultan Nazarbaev elimizde Astana Halyqaralyq qarjy ortalyǵyn ashý boıynsha júrgizilip jatqan jumystar týraly aıtty.

«2017 jyly «Bolashaq energııasy» taqyrybynda EKSPO halyqaralyq mamandandyrylǵan kórmesin sátti ótkizdik. Endi sol kórmeniń ornynda kelesi aıdan bastap Astana Halyqaralyq qarjy ortalyǵy ashylady. Ol álemdegi jetekshi qarjy ortalyqtarynyń úzdik modelderin qamtyǵan», - dedi Memleket basshysy.

Qazaqstan Prezıdentiniń aıtýynsha, AHQO aǵylshyn tilinde aǵylshyn quqyqtary negizinde qyzmet júrgizedi.

«Búgingi tańda iri halyqaralyq qarjy ortalyqtary tirkeldi. Shanhaı bırjasy jáne Amerıkanyń NASDAQ bırjasy da onyń qatysýshysy bolyp tabylady», - dedi Elbasy.

«Reseıdi de, Tatarstandy da osynaý mańyzdy sharaǵa qatysýǵa shaqyramyz», - dedi Nursultan Nazarbaev.