QR Prezıdenti: Pandemııa el eksportynyń baǵdaryn ózgertti
NUR-SULTAN. QazAqparat – Prezıdent Qasym-Jomart Toqaev saýda men aýyl sharýashylyǵyna jaýapty mınıstrlikterge otandyq ónimderdiń sapasyn halyqaralyq deńgeıde moıyndatýǵa kúsh salýdy tapsyrdy, dep habarlaıdy QazAqparat tilshisi.
«Byltyr Qazaqstan 100-ge jýyq otandyq eksporttaýshyny Ali baba halyqaralyq ınternet paltformasyna shyǵardy. 4000-nan astam qazaqstandyq taýar atalymy halyqaralyq naryqqa jol aldy. Jabyq shekaralar jaǵdaıynda biz eksporttyq baǵyttarymyz jabyq qalǵan dástúrli salalardan jańa satyp alý naryqtaryna baǵdarlaı aldyq. Mysaly, biz muzdatylǵan etti Qytaı naryǵynan Ortalyq Azııa men Taıaý Shyǵys elderiniń naryǵyna baǵyttaı aldyq», - dedi Prezıdent.
Sondaı-aq, Prezıdent qazir tamaq ónimderin jetkizýdiń aıasyn keńeıte túsý mańyzdy ekenin atady.
«Jalpy alǵanda, mal sharýashylyǵynyń sapaly ári ekologııalyq taza ónimin eksporttaý biz úshin basym baǵytqa aınalýy kerek. Otandyq ónimderdiń sapasy men qaýipsizdigi halyqaralyq deńgeıde moıyndaýy mańyzdy. Bul másele Saýda jáne ıntegratsııa mınıstrliginiń, Aýyl sharýashylyǵy mınıstrliginiń eksporttaýshylardy qoldaýdaǵy basty baǵyttarynyń birine aınalýy qajet», - dedi Memleket basshysy.
