QR Prezıdenti ózge halyqaralyq uıymdarmen áriptestikti nyǵaıtýǵa shaqyrdy

ASTANA. QazAqparat – Prezıdent Qasym-Jomart Toqaev Joǵary Eýrazııalyq ekonomıkalyq keńestiń keńeıtilgen quramdaǵy otyrysynda EAEO-nyń ózge halyqaralyq uıymdarmen áriptestigin nyǵaıtýǵa shaqyrdy, dep habarlaıdy QazAqparat tilshisi.

«Odaq qurýdaǵy negizgi maqsattardyń biri – úshinshi elderden barynsha kúshti, úılesimdi birlesken ustanym negizinde tıimdi saýda sharttaryn alý.

Integratsııalanǵan uıymdarmen, eldermen júıeli dıalogty jalǵastyrý mańyzdy. Olarmen áriptestik ornatý biz úshin ekonomıkalyq múddeniń máselesi», - dedi Memleket basshysy.

Sondaı-aq, ol odaqtyń úshinshi eldermen áriptestik ornatý sharalaryn tezdetýdi usyndy.

«Komıssııanyń Birikken Arab Ámirlikterimen, Úndistanmen, Mysyrmen, Indonezııamen, Izralılmen erkin saýda aımaǵy týraly kelisim bekitý baǵytyndaǵy jumystardy jedel aıaqtaǵany abzal.

ShYU, ASEAN, MERKOSÝR jáne ózge de halyqaralyq uıymdarmen ózara is-qımyldy sapaly túrde kúsheıtý kerek. Mundaı áriptestikke qyzyǵýshylyq ol jaqtan da bar dep oılaımyn», - dedi Qasym-Jomar Toqaev.

Keńestiń keńeıtilgen quramdaǵy otyrysyna Qazaqstan Prezıdentimen qatar Reseı Federatsııasynyń Prezıdenti – JEEK tóraǵasy Vladımır Pýtın, Armenııa Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, sondaı-aq Ázerbaıjan Prezıdenti Ilham Álıev qatysatyny habarlanǵan bolatyn.