QR Prezıdenti oblys ákimderimen kezdesti

ASTANA. QazAqparat -Elbasy oblystardyń, Astana jáne Almaty qalalarynyń ákimderimen keńes ótkizdi, dep habarlaıdy QazAqparat Aqordanyń baspasóz qyzmetine silteme jasap. 

Memleket basshysy jıyn barysynda oblystar men respýblıkalyq mańyzy bar qalalardyń ákimderine azyq-túlik baǵasynyń turaqtylyǵyn baqylaý jáne tarıfterdi retteý máselesin nazarda ustaý qajettigin aıtty.
Nursultan Nazarbaev oblystarda jylytý maýsymyn irkilissiz júrgizýdiń mańyzdylyǵyn atap ótti.

Sondaı-aq, Qazaqstan Prezıdenti Úkimetke oblystar ákimderimen birlesip, kóktemdegi sý tasqyny qaýpiniń aldyn alý jáne ony boldyrmaý jóninde sharalar qabyldaýdy tapsyrdy.

Memleket basshysy erigen qardyń sýyn toǵandarǵa jınap, olardy aýyl sharýashylyǵy qajettiligine paıdalaný múmkindikterin qarastyrýdy usyndy.

- Halyq sany eki myńnan asatyn aýyldyq eldi mekenderde jergilikti ózin-ózi basqarý júıesi engiziletin bolady. Bul - bıýdjettiń tórtinshi deńgeıi. Jergilikti jerlerge salyqtyń 7 túrin jınaý múmkindigi berildi, sondaı-aq qarajat shyǵysy 19 baǵyt boıynsha júzege asyrylady. Aldyn ala jasalǵan taldaý boıynsha, aýyldyq okrýgterdiń 11 paıyzy ǵana ózderin qamtamasyz etip, óz kirisi esebinen shyǵyndaryn jaba alady. Sondyqtan Úkimet oblystar basshylarymen birlese otyryp, osy máseleni de baqylaýǵa alýǵa tıis, - dedi Nursultan Nazarbaev.

Sonymen birge, Qazaqstan Prezıdenti elimizdi damytý jobalary men baǵdarlamalarynyń mańyzdy sıpatqa ıe bolyp otyrǵanyn halyqqa keńinen túsindirý jáne bul iske «Nur Otan» partııasyn tartý qajettigin atap ótti.

Basqosý barysynda Astana qalasynyń, Qyzylorda, Qaraǵandy jáne Shyǵys Qazaqstan oblystarynyń ákimderi óńirlerdegi ahýal týraly baıandady.